O comisario europeo do Mercado Interior, Thierry Breton, dixo a respecto da Sputnik V, que na UE “"non a necesitaremos en absoluto", afirmando que hai moitas dificultades para fabricala de forma masiva e que probablemente os europeos acabarán axudando a fabricala máis adiante.
Breton quixo sacar peito así nuns momentos nos que as dúbidas sobre a vacinación na UE están de plena vixencia, nomeadamente após os conflitos con compañías como AstraZenaca pola subministración de doses.
O comisario da UE asegurou que a mediados de xullo a Unión Europea (UE) podería estar inmunizada con todas as vacinas que se van a entregar aos estados para entón, todas producidas no seu territorio.
"Temos claramente nas nosas mans a capacidade para entregar de 300 a 350 millóns de doses de aquí a finais do mes de xuño", explicou o responsábel das compras colectivas para os 27 países da UE nunha entrevista o domingo pola noite na canle francesa TF1.
Engadiu que para o 14 de xullo, data festiva no calendario francés, existirá "a capacidade de alcanzar a inmunidade a nivel do continente".
Breton apuntou que ese horizonte é similar ao que presentou o presidente estadounidense, Joe Biden, que tamén prometeu una certa volta á normalidade para a festa do 4 de xullo, e ao do primeiro ministro británico, Boris Johnson, que fala do 21 de xuño, o comezo do verán.
