Os Brics preparan en Suráfrica a súa ampliación

A urbe surafricana de Cidade do Cabo acolleu a quinta feira a primeira xornada da reunión de titulares de Exteriores do grupo Brics (o Brasil, Rusia, a India, a China e Suráfrica), que aborda até a sexta feira a ampliación da entidade ou o estabelecemento dunha moeda común que rache a dependencia do dólar estadounidense no ámbito do comercio internacional. Coa vista posta na preparación do XV cumio dos Brics que decorrerá entre o 22 e o 24 de agosto no país, Naledi Pandor, ministra surafricana de Relacións Internacionais e Cooperación, afirmou que na xuntanza impulsarase un novo multilateralismo. Arredor desa cuestión, Anil Sooklal, un alto funcionario de Pretoria, trasladou a Reuters que no encontro -no que a China está representada por un viceministro- trátase a “situación xeopolítica mundial e a arquitectura financeira”, no marco dunha organización que “se está a colocar como unha alternativa a Occidente e como unha forma de facer espazo para ás potencias emerxentes”, explicou Cobus van Staden, do Instituto Surafricano de Asuntos Internacionais. O seu papel foi recoñecido pola Organización das Nacións Unidas para a Alimentación e a Agricultura, que sostivo que “desempeña un rol político moi importante a nivel internacional”, exercendo como exemplo para os países en vías de desenvolvemento e en disposición de “liderar a erradicación da fame e da pobreza mundial”. Esta unión concentra 40% da poboación mundial, produce máis dun terzo dos cereais do planeta e supera os países do G7 en produto interior bruto en termos de paridade de poder adquisitivo. Novas adhesións En todo caso, na axenda da xuntanza destes días hai dous puntos chave, a ampliación dos Brics e a moeda común, informa Bloomberg. Arredor do primeiro punto as reunións da sexta feira xa inclúen 15 titulares de Exteriores de África, así como de Arabia Saudita, Emiratos Árabes Unidos ou Kazhakhstán. Tamén a Arxentina, México, Nixeria ou Irán solicitaron a súa entrada no grupo, algo que xa comunicaron até unha vintena de países. O último deles foi Venezuela, unha petición á que Mao Ning, voceiro do Ministerio de Relacións Exteriores de Beijing, respondeu dando “a benvida a máis socios con ideas afíns para que se unan á familia Brics nunha data próxima”. O presidente brasileiro, Lula da Silva, apoiou ao tempo a entrada de Venezuela e adiantou que na cimeira de Suráfrica serán avaliadas as solicitudes, tras comezar o deseño en 2022 dos criterios e do proceso de adhesión. Arredor da ampliación, o analista surafricano William Gumede destacou que será chave “se poden traer os países produtores de petróleo”. En paralelo, o Novo Banco de Desenvolvemento do grupo estuda tamén a inclusión de novos membros, nunha institución na que xa ingresaron países como Bangladesh ou o Uruguai. No que atinxe á moeda común, un dos principais defensores da iniciativa é o Brasil. Lula ratificou esta semana que “soño con ter unha moeda común para que os nosos países a usen nas transaccións, para que poidamos ser independentes do dólar” e ter “máis liberdade para conducir os nosos negocios”, poñendo o euro como exemplo. Aliás, criticou os efectos da dependencia do dólar en casos como o de Venezuela, que padece un embargo por parte de Washington, apuntando que cunha moeda común podería comerciar por outras vías e subliñando que “os embargos son peores que as guerras” ao morrer “nenos, mulleres, xente maior, que non ten ningunha relación con disputas políticas”. Á vez que impulsa o papel internacional do grupo Brics, Lula tamén exerceu de anfitrión esta semana dunha cimeira cos líderes de América do Sur, na que se acordou desenvolver unha folla de ruta para a integración rexional, liderando no continente o movemento pola desdolarización do comercio, un proceso que se intensificou en varios países do mundo nos últimos meses. A sexta feira mesmo comeza o réxime de pago directo na moeda chinesa para o comercio entre Bos Aires e Beijing. Orde de detención contra Putin A polémica principal sobre a cimeira de agosto é a orde de arresto emitida pola Corte Penal Internacional (CPI) contra o presidente ruso, Vladimir Putin, ao que acusa da deportación forzosa de crianzas ucraínas nos territorios nos que decorre a guerra no país. Ao organismo non pertence Rusia mais si Suráfrica, que en teoría tería que proceder a súa detención como reclama a oposición de Pretoria. Así e todo, esta semana transcendeu que o Executivo de Cyril Ramaphosa garantiu a inmunidade ás persoas que participen no cumio, algo que considerou a “norma” nestes casos. Aínda así, o voceiro de Exteriores, Clayson Monyela, apuntou que “esta inmunidade non anula ningunha orde que puidera ser emitida por tribunais internacionais contra os participantes da conferencia”, polo que foi anunciada a presentación dun proxecto de lei para acabar co debate xurídico no que se recolle que o Executivo terá a última palabra para decidir “a quen arrestar e a quen non arrestar”, detallou Obed Bapela, viceministro da Presidencia. En abril Ramaphosa chegou a propor que Pretoria abandonase o tribunal internacional, acusándoo de falta de imparcialidade, despois do que foi sinalado por Washington por presuntamente vender armas a Rusia no contexto das hostilidades en Ucraína, o que nega. O mandatario reiterou que a posición de Suráfrica ao respecto da guerra en Europa é de “non aliñamento” e que “os conflitos se resolven mediante negociación”, polo que impulsa unha iniciativa de paz con outros líderes do continente. O Pentágono bloquea a investigación da CPI Beth Van Schaack, embaixadora de Washington para a Xustiza Penal Global, denunciou que o Departamento de Defensa está a bloquear o intento do Executivo de colaborar coa CPI na investigación de crimes de guerra en Ucraína, perante o temor de que leve a axuizar tropas estadounidenses no estranxeiro no tribunal, ao que non pertencen. Van Schaack afirmou que a CPI reduciu a prioridade das investigacións sobre crimes de guerra en Afganistán. Desde 2002 está vixente unha lei que permite a Washington usar a forza militar para liberar cidadáns arrestados pola CPI.