Lee anunciou que abandonaba os escanos do Partido Conservador mentres Johnson se defendía na Cámara da oposición e de membros denominados rebeldes que pelexan contra “un Brexit sen acordo”. Militante tory desde hai 27 anos, o parlamentario argumenta a súa decisión nunha carta en que se refire á súa xa ex organización “como unha vez gran partido e agora próximo a unha reducida facción”. Culpa da deriva “ao proceso do Brexit”.
Laboristas, Liberal-Demócratas e nacionalistas escoceses e galeses impulsan unha resolución con rango legal que obrigue ao primeiro ministro a solicitar da Unión Europea unha ampliación do prazo de negociación de polo menos dous meses. O obxectivo é evitar a chamada “saída dura”.
Despois do abandono de Philip Lee, a maioría de Johnson mantén 320 asentos na Cámara dos Comúns, os mesmos que a oposición. Mais na alianza conservadora, dez pertencen aos unionistas norirlandesas de dereita dura DUP e outro a un parlamentario suspendido por abusos sexuais. A maiores, analistas estiman que entre 10 e 20 membros do grupo conservador apoian a iniciativa para evitar o “Brexit duro”.
Nota: carta do parlamentario Philp Lee a Boris Johnson en que explica por que abandona o Partido Conservador.
