A cofundadora da Asociación Nais de Praza de Maio en Arxentina, Hebe de Bonafini, enviou unha carta á raíña Isabel de Inglaterra onde lle solicita a devolución das 31 toneladas de lingotes de ouro valorados en 1.000 millóns de dólares que Venezuela ten almacenado no Banco de Inglaterra e que a entidade británica se nega a devolver.
"Eu creo, mellor dito, estou convencida, que vostede non necesita ese ouro, nin tampouco o pobo do seu país. Atrévome a lle dicir, de muller do pobo a muller que reina: non lle parece un abuso da súa parte? Ese roubo, non é un atropelo?", pregunta a histórica activista polos dereitos humanos no seu país e a nivel internacional.
Na carta dirixida á xefa do Estado do Reino Unido, datada en Bos Aires o pasado sábado, 4 de xullo, Bonafini afirma que ousa escribirlle "porque desde hai 43 anos na Arxentina, a miña vida enteira está dedicada aos que menos teñen".
"Nestes días tiven coñecemento de que o seu país, que sempre foi colonialista, decidiu roubar o aforros en ouro, depositados nos bancos ingleses, ao pobo de Venezuela", continúa a carta, que remata sinalando que "amo o sufrido pobo de Venezuela tanto como amo o meu". "Agardo que me saiba entender e poida abrir a súa man que xa ten demasiado ouro e que estou segura non necesita máis", conclúe Hebe de Bonafini.
O Tribunal Superior do Reino Unido ditaminou a semana pasada que é a Administración ad hoc do líder opositor venezolano Juan Guaidó, e non a do presidente Nicolás Maduro, a que pode acceder legalmente ás reservas de ouro de Venezuela depositadas no Banco de Inglaterra.
O Goberno venezolano argumenta que, aínda que o Goberno británico recoñeceu a Guaidó como "presidente interino", na práctica "mantén lazos diplomáticos" co Executivo de Maduro.
