Primeira reacción da xustiza ao decreto de inmigración de Trump que restrinxe a entrada de persoas musulmás nos EUA. James Robart, xuíz federal da cidade de Seattle, vén de bloquear a medida anti migrantes, unha decisión que representa un enorme reto ao decreto adoptado polo presidente estadounidense.
A suspensión ten vigor até que Robart adopte unha decisión definitiva sobre a legalidade da orde presidencial ou até que unha instancia xudicial superior decida levantala.
Neste sentido, a Casa Branca comunicou a través do portavoz, Sean Spicer, que o Departamento de Xustiza dos EUA está a realizar os trámites para presentar de inmediato un aprazamento de emerxencia á orde de restrición temporal decretada polo xuíz federal de Seattle.
Desde o despacho oval cualificouse de “indignante” a suspensión temporal ditada polo xuíz e advertiuse de que a orde de Trump é “legal e apropiada”. “A orde do presidente ten a intención de protexer a patria e ten a autoridade constitucional e a responsabilidade de protexer o pobo estadounidense”, defendeu a Casa Branca.
