O dereito a decidir sobre a organización territorial de "España" corresponde só a "España" e "baixo ningún concepto" unha minoría da cidadanía --neste caso o pobo catalán-- poderá votar sobre o futuro do Estado español. É isto o que proclama a moción que UPyD presentou no Congreso d@s deputad@s e que foi aprobada cos únicos votos de PP e PSOE, para alén dos da formación de Rosa Díez.
A votación volveu evidenciar a fenda entre o PSC e o PSOE, pois @s 14 membros do primeiro racharon a disciplina de voto e abstivéronse. O mesmo xa acontecera en febreiro, cando o PSC apoiou senllas mocións de CiU e IU-ICV en prol da consulta soberanista en Catalunya e tiveron que facer fronte a unha sanción de 600€, a máxima contemplada para estes casos. O PSOE votara en contra.
Desta volta, Rosa Díez explicou na súa quenda de intervención que a moción interposta polo seu partido era "necesaria" para "deixar as cousas claras" perante a "falacia" da consulta independentista que reclama o pobo de Catalunya. O PSOE, que cualificou a iniciativa de "oportunista", explicou que non podía rexeitala, malia a todo, porque o texto achegado "reafirma a Constitución española".
Xornalismo de calidade e en galego, sen ti, sería imposíbel!
Facer un xornalismo crítico sen máis ataduras que as que nos unen á promoción e defensa dos intereses galegos precisa da túa colaboración. Subscríbete.