A BioNTech espera que a vacina contra a Covid-19, que desenvolveu en parceria coa Pfizer, estea dispoñíbel para mozos e mozas de 12 a 15 anos en Europa a partir de xuño.
O CEO da empresa alemá, Ugur Sahin, afirmou á revista Der Spiegel que a proposta para aprobación do regulador europeo estaba na fase final.
A avaliación dos datos do ensaio clínico "demora de catro a seis semanas en media", engadiu o responsábel.
A farmacéutica BioNTech/ Pfizer anunciaba a principios de abril que a súa vacina de ARNm fronte á Covid-19 evita a enfermidade sintomática en mozas de 12 a 15 anos e, ademais, foi ben tolerada por estes.
O laboratorio comunicaba daquela que remitiría os datos da fase III do ensaio clínico ás axencias regulatorias para unha modificación das condicións de uso da vacina Comirnaty.
A este respecto, o CEO da empresa manifestoaba que pensaba que os adolescentes poderán acudir xa vacinados aos seus centros docentes para o vindeiro curso.
O ensaio incluíu 2.260 persoas e a comparativa foi a resposta inmune sérica en relación á observada nos adultos. A media dos anticorpos neutralizantes nos de 12 a 15 anos chegou a 1.239 fronte a unha media de 705 observada nos de 16 a 25 anos.
Ademais da inmunoxenicidade, a vacina tamén evitou os casos clínicos, xa que no grupo de vacinados os casos foron cero por 18 nos que recibiron placebo.
