<p>As bases de EH Bildu decidirán entre o 2 e o 3 de xaneiro se aceptan a proposta da dirección da coalición soberanista para absterse na sesión de <a target="_blank" href="https://www.sermosgaliza.gal/articulo/internacional/debate-investidura-sera-dias-4-5-7-xaneiro/20191231121335089009.html">investidura </a>do candidato do PSOE á reelección como presidente do Goberno central, Pedro Sánchez.</p>
<p>O contido concreto da pregunta que se formulará ás bases de coalición soberanista é o seguinte: "Estás de acordo con que os cinco deputados e deputadas de EH Bildu no Congreso español faciliten mediante a abstención activa a investidura do candidato do PSOE, Pedro Sánchez, como presidente do Goberno español, para que conforme goberno con Unidas Podemos?.</p>
<p>A Mesa Política de EH Bildu xa deu a coñecer na segunda feira, 30 de decembro, que é <a target="_blank" href="https://www.sermosgaliza.gal/articulo/internacional/tambores-de-investidura/20191230092430088951.html">partidaria de absterse </a>na investidura de Sánchez, dado que un Goberno de coalición entre o PSOE e Unidas Podemos "abre unha xanela de oportunidade para a resolución dos graves problemas estruturais do Estado".</p>
<p>Aínda que esta é a proposta da dirección de EH Bildu, a última palabra sobre cal será o sentido do voto das representantes da coalición no Congreso dos Deputados recaerá na militancia, que entre os días 2 e 3 de xaneiro deberá pronunciarse ao respecto nunha consulta.</p>
<p>O prazo para participar na votación péchase ás 12.00 horas da sexta feira, 3 de xaneiro, segundo informou hoxe a propia formación soberanista nun comunicado.</p>
<p>O pleno de investidura decorrerá no Congreso dos Deputados durante os días 4 e 5 de xaneiro e, de o candidato do PSOE non obter unha maioría absoluta de apoios, repetirase a sesión o día 7 de xaneiro onde xa só se precisa unha maioría simple de votos afirmativos.</p>
