A Axencia Europea do Medicamento (EMA) recomendou "seguir administrando" a vacina da Covid de AstraZeneca na UE, tras ser suspendida esta quinta feira por varios países europeos por problemas de coagulación diagnosticados tras a inoculación. "Os beneficios seguen a superar os riscos", dixo.
O comité de seguridade (PRAC) da EMA, reunido hoxe para revisar os casos de eventos tromboembólicos e outras afeccións relacionadas con coágulos sanguíneos, concluíu que, por agora, "non hai indicios de que a vacinación cause estas afeccións, que non se enumeran como efectos secundarios desta vacina".
As autoridades sanitarias de Dinamarca e de Noruega anunciaran pola mañá que suspendían temporalmente o seu uso tras varios informes sobre a formación de trombos nalgúns dos vacinados. Medida tomada logo de Austria deixar de usar un lote de inxeccións de AstraZeneca mentres investigaba unha morte por trastornos da coagulación e unha enfermidade por unha embolia pulmonar. Tamén Italia suspendeu o uso dese lote austríaco. Islandia, Estonia, Letonia, Lituania e Luxemburgo anunciaron que agardarían á avaliación da EMA.
Ao respecto, a Axencia Europea do Medicamento asegurou que "o número de eventos tromboembólicos en persoas vacinadas non é maior que o número observado na poboación xeral". A EMA recibira até hoxe a notificación de 30 casos similares de entre os cinco millóns de persoas vacinadas co fármaco de AstraZeneca na UE.
O PRAC continuará a investigar os casos reportados en días posteriores á vacinación con AstraZenenca. "Así se complete a revisión, o PRAC fará as recomendacións necesarias para minimizar os riscos e protexer a saúde dos pacientes", sinalou.
Janssen, Pfizer, Sputnik
Ademais, autorizou a distribución da vacina de Janssen na UE. A EMA salientou a seguridade deste fármaco, xa que só mostrou "efectos secundarios xeralmente leves ou moderados" que desapareceron un par de días tras a inoculación. A vacina, da empresa Johnson&Johnson, únese na UE ás desenvolvidas polas compañías Pfizer-BioNTech, Moderna e AstraZeneca.
Por outra banda, a UE anunciou a adquisición doutros catro millóns de doses da vacina de Pfizer-BioNTech. E da Sputnik V, Thomas Mertens, director de vacinación do Instituto Robert Koch, axencia alemá responsábel do control de enfermidades, afirmou que "é unha boa vacina que semella será aprobada na UE nalgún momento". "Os investigadores rusos teñen moita experiencia en vacinas", sinalou Mertens no xornal Rheinische Post.
