Se finalmente o Exército sirio recuperar o control sobre toda a cidade, a guerra podería estar a piques de entrar no seu epílogo. Nas últimas semanas, foron moi intensos os bombardeamentos da aviación rusa sobre a zona oriental de Aleppo e o contributo da milicia iraniana Hezbolá -ten alí destacados 5 mil combatentes- ten sido decisivo no desenvolvimento das hostilidades.
A ofensiva lanzada hai catro semanas polo Exército está a piques de conseguir todos os seus obxectivos. Os chamados rebeldes batéronse en retirada do casco vello da cidade, por non estaren en condicións de resistir o asedio. Neste momento, as tropas regulares sirias e os seus aliados controlarían as tres cuartas partes de Aleppo.
A canle televisiva de Hezbollah, Al Manar, informou de que as tropas sirias permitiron a formación dun corredor humanitario para a evacuación de milicianos rebeldes -entre eles yihadistas- aos que se insta a abandonar o casco vello, visando interromper os bombardeamentos e a destrución do patrimonio histórico-artístico desta cidadela medieval.
Rusia anunciou que quen non se sumase á evacuación sería tratado como terrorista.
Os rebeldes demandan un cesar o fogo de no mínimo cinco días e a evacuación imediata de 500 persoas que precisan de atención médica, sob supervisión de Nacións Unidas.
Mentres tanto, a canle libanesa Al Mayadeen revelou que Israel tería lanzado un ataque á base área de Mezze, perto do centro de Damasco, coa pretensión de castigar posicións controladas por Hezbollah.