![[Imaxe: RTVE] O líder do Partido da Independencia, Bjarni Benediktsson, no momento de votar](/asset/thumbnail,1280,720,center,center/media/nosdiario/images/2016/10/30/20161030161314696.jpg)
As eleccións lexislativas deste sábado en Islandia revalidan a coligazón de centro-dereita que xa gobernaba o país. O conservador Partido da Independencia fíxose co 30,3% das papeletas, mais dependerá de apoios para seguir no poder.
Reforma, escisión do partido vencedor, resulta indispensábel para compensar o afundimento do Partido Progresista, que acadou a cuarta posición co 10,1% dos votos. Caeu 14 puntos porcentuais e 12 dos seus 19 escanos. Acusa, así, a vinculación do ex primeiro ministro, Sigmundur David Gunnlaugsson, cos papeis de Panamá.
A segunda forza máis votada, co 16,2% dos apoios, é o Movemento da Esquerda Verde, seguido do Partido Pirata, que obtivo o 13,5% das papeletas, máis do duplo que nos comicios de 2013. A suma dos votos de ambas as dúas formacións, e mais de Alianza Socialdemócrata e Futuro Brillante sería insuficiente para lle facer fronte ao centro-dereita.
