A maxistrada que xulga en Londres o caso de extradición de Julian Assange aos EUA denegoulle na cuarta feira a liberdade condicional ao considerar que existe posibilidade de fuga. A defensa do fundador de WikiLeaks solicitara esta medida despois de a xustiza, en primeira instancia, desbotar na segunda feira que fose entregado ás autoridades do país norteamericano polo risco de suicidio.
A fiscalía británica, en representación dos EUA, prepara o recurso a esta decisión dentro do prazo límite estabelecido de 14 días a partir da decisión xudicial, que será presentado ante o Alto Tribunal de Xustiza de Londres (a corte suprema para Inglaterra e Gales).
De non lograr o seu obxectivo aquí, aínda podería apelar en última instancia ao Tribunal Supremo do Reino Unido.
"Estou convencida de que hai fundamentos importantes para crer que se o señor Assange é liberado hoxe non cumpriría coa obriga de se presentar ante o tribunal para afrontar o procedemento de apelación", manifestou a xuíza Vanessa Baraitser no Tribunal de Maxistrados de Westminster, encargado de dirimir na xustiza inglesa e galesa os casos de extradición e terrorismo.
A compañeira sentimental de Assange, Stella Morris, manifestou a decepción pola decisión xudicial e pediu o perdón dos EUA. Ao respecto, WikiLeaks anunciou que apelará a negativa á liberdade condicional.
Clair Dobbin, avogada que representa os EUA, sinalou pola súa banda que Assange fixo no pasado o imposíbel para evitar a extradición e dixo estar convencida de que tentaría fuxir do Reino Unido en caso de se lle conceder a liberdade condicional mentres dura o trámite das apelacións. Neste sentido, salientou "a disposición doutros Estados a ofrecer protección a Assange".
Ademais, Dobbin cre que os argumento da saúde mental para impedir a extradición fai que a decisión final "penda dun fío".