Alexander Zajarchenko, dirixente da República popular de Donetsk, faleceu nun atentado que tivo lugar na cidade de Donetsk e no que 11 persoas máis resultaron feridas, 6 delas de gravidade e entre as que está o ministro de Finanzas, Alexander Timofeiev.
O estoupido tivo lugar nunha cafetaría no centro da cidade e as forzas de seguridade xa detiveron varias persoas para ser interrogadas pola súa posíbel relación con este atentado.
O presidente do Consello Popular da República, Denis Pushilin, afirmou que o atentado foi organizado polo "goberno fascista de Kiev". "É unha nova agresión por parte de Ucraína", declarou Pushilin.
Moscova igualmente considera o ocurrido un atentado. María Zajárova, portavoz do Ministerio de Exteriores, afirmou que "existen todos os motivos para supoñer que detrás do asasinato está o rexime de Kiev, que xa noutras ocasións empregara este tipo de métodos para eliminar disidentes".
Desde o Servizo de Seguridade de Ucraína (SBU) apresuráronse a negar calquera relación co atentado.