mércores 29.01.2020

Após a filtración da súa proposta de derrubar Iglesias, Bescansa renuncia a ir na candidatura

Bescansa responsabiliza a súa equipa da filtración dunha proposta de entente con Errejón para desprazar Pablo Iglesias do liderado de Podemos. A politóloga compostelá é a primeira vítima desta nova crise de Podemos: finalmente non concorrerá ás eleccións autonómicas en Madrid.

Bescansa, nun acto con Echenique
Bescansa, nun acto con Echenique

Un documento pendurado uns minutos en Telegrama basta para deitar fóra da carreira de Madrid a co-fundadora de Podemos Carolina Bescansa. O aparente desliz de deixar ver na rede de comunicación unha proposta para tombar Pablo Iglesias -supostamente pactada con Errejón- criou unha situación políticamente insustentábel para a politóloga. Errejón apresouse a se desmarcar do asunto. "Descoñecíao. É delirante e inapropriado". dixo. Bescansa, por súa parte, tamén puxo terra de por medio sobre o documento: "É un rascuño que nin sequera revisei".

É evidente que o documento foi filtrado á imprensa con intencionalidade política. As hipóteses aquí basicamente son dúas: que se fixese chegar aos meios para torpedear a entente Bescansa-Errejón ou que se deslizase esta información para inviabilizar a candidatura errejonista á comunidade autónoma de Madrid.

O aparato central do partido, controlado por Iglesias, lonxe de restar dramatismo ao episodio, falou da "extrema gravidade" do asunto. Até o ponto de non se desbotar o cenario de ruptura con Errejón, quen tería perdido a confianza do núcleo de dirección da formación morada.


 

comentarios