Ao límite da saída do Reino Unido da Unión Europea, o país e o Estado español chegaron a un principio de acordo para que non haxa problemas na fronteira con Gibraltar. Foi o propio ministro de Exteriores británico, Dominic Raab, quen informou do achegamento das posturas para “garantir a fluidez na fronteira”.
O representante do Reino Unido explicou que, acompañado do ministro principal do territorio, Fabian Picardo, logrou con España “un marco político que sente a base dun tratado separado entre Reino Unido e a UE”.
En calquera caso, o documento xurdido polo Brexit terá que pasar pola Comisión Europea para ter o aprobado e “comezar as negociacións do tratado formal”.
No período intermedio, ambas partes intentarán “mitigar os efectos da fin do período de transición sobre Gibraltar” sen causar prexuízos á cidadanía.
“Temos unha relación cálida e forte con España e estamos desexando construír sobre ela en 2021”, engadiu Raab, após agradecer o traballo da súa homóloga Arancha González Laya.
Esta anunciou que cae “a cancela” pola aplicación das normas do Acordo de Schengen. “Isto permite suprimir os controis”, incidiu a representante do Goberno do Estado español.
Após ter recibido esta nova, o presidente Pedro Sánchez empregou a súa conta de Twitter para explicar que o acordo “permitirá eliminar barreiras e avanzar cara unha zona de prosperidade compartida”.
