xoves 16.07.2020
Washington lanza unha nova guerra comercial

AMLO responde a Trump: "Non son covarde nin timorato, mais non quero confrontación"

"Non me falta valor, non son un covarde nin timorato, senón que actúo por principios: creo na política que, entre outras cousas, se inventou para evitar a confrontación e a guerra", escribiu o presidente de México, Andrés Manuel López Obrador (AMLO) nunha misiva a Donald Trump. Washington anunciou esta quinta feira a imposición de gravames (un arancel de 5 por cento) ás exportacións mexicanas. Os EUA responsabilizan o executivo do país azteca da chegada de inmigrantes irregulares a solo norteamericano.

Alfredo Manuel López Obrador
Alfredo Manuel López Obrador

Trump abre unha guerra comercial con México, país que desde a chegada de AMLO á súa presidencia marcou distancias con Washington. O presidente republicano non perdoa a López Obrador que non se sumase aos apoios expresados desde outras capitais latinoamericanas ao golpe en curso en Venezuela. Os aranceis (comezarían no 5 por cento mais irían medrando se a inmigración irregular non cesa) serían a factura a pagar polo goberno mexicano.

Na súa misiva a Trump, AMLO razoa que os problemas "non se resolven con impostos ou medidas coercitivas. Como converter da noite á mañá o país da fraternidade para cos migrantes do mundo nun guetto, nun espazo fechado onde se estigmatiza, se maltrata, se persegue, se expulsa ou se cancela o direito á xustiza a quen busca con esforzo e traballo vivir libres de miseria".

Conciliador, López Obrador tira da historia para ilustrar que é perfeitamente posíbel manter unha relación fraterna cos EUA: "Cando a expropiación petroleira, o presidente demócrata Franklin D. Roosvelt entendeu as profundas razóns que levaron o presidente patriota Lázaro Cárdenas a actuar en favor da nosa soberanía".

É dubidoso que este apelo á memoria do presidente do New Deal vaia conmover Donald Trump, cada día máis disposto a utilizar as armas da guerra económica contra os gobernos que non seguen as súas consignas.

AMLO responde a Trump: "Non son covarde nin timorato, mais non quero confrontación"
comentarios