Tal e como estaba previsto, este mediodía empezaron a saír do cárcere os nove presos políticos cataláns en relación ao ‘procés’. A primeira en abandonar a prisión foi a ex presidenta do Parlament Carme Forcadell.
Ao saír, foi recibida por ducias de persoas e representantes de partidos, sindicatos e diferentes colectivos, así como pola actual presidenta do Parlament, Laura Borràs; e varios consellers.
A continuación, tomou a palabra e lembrou que “nós queremos a amnistía”. Sinalou que “hoxe é un día de alegría, mais non é completa porque o que queremos é o final da represión, que todas as persoas represaliadas poidan saír á rúa libremente e que os exiliados poidan regresar». A seguir, saíron da prisión de Lledoners o líder de ERC, Oriol Junqueras; os ex consellers Quim Forn, Josep Rull, Jordi Turull e Raül Romeva; o president de Òmnium Cultural, Jordi Cuixart; e o secretario xeral de Junts, Jordi Sànchez. Unha vez saíron de Lledoners, os sete presos do procés pousaron cunha pancarta na que se podía ler: “Freedom for Catalonia”.
Tras recibir o apoio das persoas congregadas no exterior da prisión, entre os que se atopaba o president da Generalitat, Pere Aragonès, dirixíronse aos reunidos.
Na súa intervención, Jordi Cuixart sinalou que “non existe o indulto que faga calar ao pobo de Catalunya” e asegurou que “hoxe non é un día de renuncia, é un día no que os cataláns nos reafirmamos para seguir loitando. A represión non nos venceu e nunca nos vencerá”.
Pola súa banda, Jordi Sánchez destacou que “hoxe é un grande día para este país, porque a pesar de todo o que a xustiza española e o Estado nos fixo, saímos todos xuntos, dignos e unidos. Non aceptaremos ningún silencio a cambio dos indultos”.
A última en saír do cárcere foi a ex consellera Dolors Bassa. Ela tamén tomou a palabra nada máis abandonar o cárcere, unha intervención na que asegurou que “a represión non acabou, pero este é un primeiro paso”.
