Pola mañá na Coruña e pola tarde en Compostela, Pontevedra, Vigo, Ferrol, Lugo, Ourense, Redondela e Vilagarcía, a maré cidadá inundou e está a inundar rúas en protesta polo “golpe de estado financieiro” e na defensa de dereitos e liberdades públicas.O "Grândola, Vil
a Morena" converteuse na banda sonora en boa parte das mobilizacións.
Nun día marcado con especial forza no calendario reivindicativo ao se cumpriren os aniversarios do intento de golpe de estado militar e máis da maior manifestación galega en Madrid, que tivo lugar hai dez anos contra o atentado do Prestige, as rúas galegas viviron unha xornada de protesta na que se demandan dereitos e liberdades contra os recortes impostos polo PP.
A marcha da Coruña, a única celebrada pola mañá, coincidiu coa manifestación das preferentes, causa que tamén asumiu a maré cidadá, así como o dereito a unha vivenda digna, o que ficou en especial evidencia ao pararen diante da vivenda de Aurelia, a muller que vive estes días a ameaza de desafiuzamento. “Chamamos a confluencia de aqueles colectivos e persoas que nos vemos violentamente afectadas polas políticas de recortes e polo saqueo do público que se está a exercer desde o
poder político institucional” sinalaban na convocatoria que levou á rúa milleiros de persoas por todo o país. Máis de oitenta cidades en todo o Estado secundaron tamén esta mobilización.
(Arriba, imaxe da manifestación na Coruña. Á dereita, da de Ourense)
