A actual crise non deixa sector produtivo indemne. Nin a industria, nin a construción nin os servizos. Mais os sectores primarios (pesca e agricultura) están a ser varridos do mapa. Un escenario que, enunciado por oposición e sindicatos, confirma agora datos oficiais publicados polo Instituto Galego de Estatística (IGE).
Así, e entre o terceiro trimestre de 2009 e o primeiro trimestre de 2013, o número de ocupad@s en agricultura e gandeiría baixaba de 68.700 a 53.900 persoas. Unha perda de 14.800 persoas en pouco máis de tres anos. Neste sector destruíuse nesa etapa o 21,5% dos seus empregos. Unha perda de por volta de trece empregos cada día.
Esta destrución de empregos non deixa de ser outro indicativo do abandono e marxinación do rural, sometido desde hai décadas a unha sangría que se está a acelerar nos últimos anos. Recortes en servizos públicos, ausencia de perspectivas, queda demográfica e envellecemento da poboación... todo iso combinado leva ao 'deserto' poboacional.
Perda
No outro sector produtivo galego, o mar, a situación é aínda peor canto á perda de persoas ocupadas.
No terceiro trimestre de 2009 había 24.000 persoas traballando na pesca e acuicultura. Tres anos e medio despois, a principios de 2013, ese número era só de 16.400, segundo os propios datos oficiais. O que supón 7.600 persoas menos. En porcentaxe, o sector primario do mar perdeu o 31,7% dos e das súas ocupadas.
Isto, aliás, coincide cun descenso nos ingresos medios de sectores tan importantes como o marisqueo ou a frota de baixura, mesmo no outrora poderoso sector bateeiro (mexilloeiro).
Recoñéceno confrarías como as da marxe norte da Ría de Arousa: "Disparáronse os custos e os prezos aos que nós vendemos son máis baixos". E a introdución de marisco foráneo (berberecho, ameixa, mexillón...) que se comercializa como se fose galego vai a máis.
Contrasta, porén, esta sangría de empregos nos sectores produtivos máis básicos, coa aposta que por mar e agro están a facer en países como, por exemplo, Dinamarca ou Franza. Ambos os dous estados están a asentar os empregos ligados ao mar e ao rural como contraforte contra a crise.
