Este concello da comarca de Ferrolterra sumouse este sábado (19 de outubro) á listaxe de administracións locais que financiarán @s doentes crónic@s os tratamentos sobre os que o Goberno español aplicou o re-pagamento.
Segundo o seu alcalde, o nacionalista Secundino García Casal, "ningún veciño ou veciña quedará sen medicamentos por non os poder pagar". Para o rexedor de San Sadurniño, "non pode haber quen se considere persoa" e dea por boas "decisións que condenan directamente á morte a homes e mulleres" enferm@s de cancro ou leucemia "polo simple feito de carecer de diñeiro".
Neste senso, o Concello asumirá o pagamento dese "10% até un máximo de 4,20 euros" fixado no decreto que aprobou o exectivo de Mariano Rajoy, "independentemente da renda" d@s veciñ@s e do custe total do tratamento. Porén, explicou Secundino García, "agardamos que a presión social obrigue ao PP a paralizar esta decisión".
A decisión, que será debatida no pleno municipal que a corporación desenvolverá o vindeiro 9 de novembro, visa "gobernar priorizando na xestión dos fondos públicos a defensa dun sistema sanitario público e gratuíto".
Así, o alcalde de San Sadurniño denunciou que a Xunta sexa "cómplice" desta medida ao se negar a non aplicala. Asemade, lanzou un chamamento aos demais concellos da comarca a que participen activamente na asemblea nacional convocada polo alcalde de Riotorto, Federico Gutiérrez Estoa, e que terá lugar a vindeira semana.
