Na comisión sobre a corrupción ficarán só os partidos do réxime bipartidista. Un, o PSOE, condenado no seu día por Filesa. Outro, o PP, envolvido no caso Gürtel e no caso Bárcenas-Rajoy. Vaise dar a circunstancia, portanto, de que os partidos con máis casos de corrupción nas súas fileiras serán os que abordarán este asunto no Parlamento galego.
BNG e AGE resolveron abandonar a comisión ante o que cualifican de uso partidista deste órgao por parte da maioría gobernante, e ante o veto que os conservadores interpoñen contra a comparecencia de Feijóo.
Financiación irregular
En realidade, non semella nada operativa unha comisión que non pode contar co testemuño do presidente do PPdeG, despois de se coñecer que a organización galega do partido conservador contribuíu para engrosar a contabilidade B de Bárcenas.
Tamén existen serias sospeitas de que empresas que financiaron o PPdeG obtiveron logo sustanciosos contratos da Administración galega.
A comisión é hoxe un estorbo para un PPdeG ao que anima un único obxectivo: blindar o seu líder e mantelo vivo na carreira sucesoria. Neste sentido, unha recente crónica de La Voz de Galicia -diario moi próximo a Feijóo- revelaba que o presidente da Xunta mantén intactas as súas opcións a relevar a Rajoy na hipótese de que este finalmente cedese a lideranza [hipótese que, de acordo con outras fontes, tampouco é tan clara]).
