O auto de Pilar de Lara sinala que está a investigar ao home da portavoz de PP, Paula Prado para comprobar se empregou a súa “relación matrimonial” para beneficiar a súa empresa coa venda de materiais textís a organismos públicos entre os que se atoparían dous concellos con grupos de goberno do PP, Boqueixón e Santiago, no que a propia Prado foi concelleira de goberno. O home da voceira do PP podería ser acusado de delito de tráfico de influencias e falsidade documental, xa que existe a posibilidade, que se está a investigar, de que tivera emitido facturas falsas da venda de produtos textís por medio de intermediarios e persoas interpostas.
As probas que manexa De Lara son, de novo, intervencións telefónicas e informes de Vixiancia Aduaneira, da que se deducen o presunto beneficio que tería obtido o home de Paula Prado ao se beneficiar da relación coa actual voceira do PP, amparado tamén na influencia doutras persoas “fortes” do goberno de Compostela como o ex-xefe de gabinete Ángel Espadas, do aínda concelleiro de Deportes, Adrián Varela -acusado, entre outras cousas, de tentar despedir a unha traballadora por ser compañeira dun sindicalista da CIG- ou o exconcelleiro Albino Vázquez, os tres implicados na Operación Pokemon. De Lara investiga facturas non só do Concello senón de varios organismos públicos dependentes.
A xuíz de Lara sinala por segunda vez a Paula Prado despois de se dar a coñecer as conversas telefónicas nas que, entre outras cousas, gabábase de ter engadido 3.000 euros ao custe real dun contrato polo espectáculo "A abella Malla". O PP, polo de agora, non fixo ningún movemento para afastar a Prado do seu posto de voceira no Parlamento.
