O persoal de Povisa entende que é imprescindíbel informar á cidadanía do conflito polo que están a pasar e, para iso, a praia de Samil en pleno agosto é un lugar acaído para que milleiros de persoas de Vigo e a comarcan saiban de primeira man da situación. Cinco días antes do día 19 de agosto marcado para a folga, as mobilizacións chegaron ao areal máis populoso de Vigo coa acción que denominaron “abrazo a Samil”
Despois da grande pegada de cartaces polas rúas de Vigo e máis a manifestación da segunda feira arredor do hospital, a camiñada pola praia de Samil deixa á vista que o persoal non parará coas súas mobilizacións até conseguiren que a empresa desista de impoñer as condicións que anunciou e que supón entre un 40 e un 52% de rebaixas salariais.
A manifestación trasladouse á praia na que un grupo amplo do persoal informaron da ruptura de negociacións para un novo convenio entre os sindicatos e a patronal, que teima en impor a drástica redución de condicións salariais e dereitos consolidados, apoiándose na reforma laboral pola que, ao non haber acordo, impón o convenio provincial de maneira unilateral.
O comité de empresa manifesta tamén que a empresa está a empregar distintas manobras co fin de impedir a realizaciónd a folga e rachar cos servizos mínimos pactados, situación que foi denunciada diante a Inspección de Traballo.
O conflito laboral está a supor grandes inconvintes ás persoas que están asignadas a Povisa e xa a semana pasada 8,000 sinaturas foron entregadas no Valedor do Povo. O comité de empresa esixen ao Sergas e á Consellaría de Sanidade que se impliquen e traten de resolver a situación xa que son as principais sufragadoras do complexo hospitalario.