“A Xunta non se priva de utilizar cartos públicos autonómicos para atacar a propia configuración autonómica galega que lle permite dispoñer deses cartos” denuncia a CIG da Administración. Sinala, desta maneira, que se están a detraer cartos da Escola Galega da Administración Pública que tiñan que estar destinados á formación continua das persoas con emprego público para organizar cursos “de adoutrinamento político aos que inventar aos amigos do partido”.
Negreira e Romay Beccaría, poñentes
Entre os participantes do curso “Futuro do Estado Autonómico” atópanse o alcalde da Coruña, Carlos Negreira ou Romay Beccaria, presidente do Consello de Estado , ex-conselleiro de Sanidade con Fraga e recoñecido membro do Opus Dei. Ademais, entre os once homes que compoñen o programa, atópase Tomás Ramón Fernández Rodríguez, catedrático emérito da Complutense e popular por defender en programas televisivos da ultradereita a necesidade de reformar o título VIII da Constitución para reducir competencias das autonomías ou Roberto Blanco Valdés.
Segundo a CIG-Administración, a organización do curso responde “ao camiño trazado pola FAES, fundación que marca a liña ideolóxica do PP, no sentido de atacar á función pública primeiro, logo ás autonomías e do Estado do Benestar, en xeral”. Trátase, ao seu ver, dunha actividade partidista, “non de formación senón de ideoloxización”, na que se veta calquera posición que se opoña á recentralización do Estado.
O curso comeza o mércores ás 19 horas e a Xunta publicitouno con correos directos aos enderezos corporativos do conxunto de traballadores e traballadoras.