“Unha persoa, unha conta corrente”. Ese é o lema que semella guiar o enésimo e dramático capítulo da gran estafa bancaria que atinxe unhas 80.000 persoas en Galiza, condenadas a perderen boa parte dos seus aforros por investiren baixo engano nas participacións preferentes das antigas caixas [o Consello de Ministr@s ten previsto aprobar esta sexta feira 15 de Marzo unha quita de arredor do 40 por cento]. Milleiros d@s afectad@s recorren agora á arbitraxe coa esperanza de que lles restitúan os seus cartos, mais segundo diversas informacións moit@s deles e delas atópanse coa ingrata sorpresa de o mecanismo formalizado polo Estado só recoñecer unha conta corrente por vítima do calote, polo que aqueles que repartiron os seus aforros en varias ven definitivamente perdido -a palabra correcta sería roubado- o diñeiro dos outros depósitos.
Fontes de Adicae (Asociación de Usuarios de Bancos, Caixas e Seguros) e da Plataforma de Afectad@s de Vigo confirman a quita da quita que supón só proceder á arbitraxe sobre unha conta e non sobre a totalidade dos aforros ingresados en preferentes. “Sabemos de xente que acudiu á arbitraxe, mais tiñan repartido o diñeiro en varias cartillas e só puideron recuperar o relativo a unha, perdendo o resto”, sinalan dende a Plataforma. Segundo diversos cálculos, esta situación puido afectar polo de agora a arredor do cinco por cento dos milleiros de aforradores que acudiron á arbitraxe e lograron recuperar as cantidades investidas. Que non son moit@s porque a maioría d@s que utilizaron este mecanismo non obtiveron ningún tipo de resultado positivo.
Podes atopar toda a información relativa a este asunto no número 39 do noso semanario, xa disponíbel nos quiosques do país.