O ditame da Audiencia Provincial é claro, as persoas que foran condenadas a prisión pola súa participación na folga de comercio e alimentación desenvolvida en 2009 en Pontevedra fican absoltas de todo cargo e non se admitirá recurso algún. Marcos Cadórniga, un dos sindicalistas da CIG condenados que tomaban parte da folga de fame iniciada hai dez días perante a Audiencia Provincial, lembra que a absolución non debe implicar baixar os brazos na loita contra a represión sindical.
Cadórniga agradece os centos de apoios e mostras de solidariedade recibidos ao longo deste proceso. Este mozo de Escairón valora a absolución "a nivel do entorno persoal, da familia, que levaba pasándoo mal este tempo. Mais tamén apunta, "e como sindicalista", que "é terríbel que tivese que pasar todo este tempo, o xuizo e as mobilizacións, para que a xustiza tomase unha decisión xusta".
Para Marcos Cadórniga, e malia absolución, "o problema que tiñamos onte seguímolo a ter hoxe: Queren reprimir e encarcelar a sindicalistas por defenderen o dereito á folga". Lembra este mozo os casos de Antolín Alcántara ou mesmo ao responsábel da CIG maltratado recentemente nunha comisaría de Ferrol.
Continuar
Para Cadórniga, coa absolución mostrouse que "a mobilización e a contestación social si serven", mais incideu en que o goberno español estase a peparar para unha verdadeira "ofensiva" contra o sindicalismo. Pon como exemplo "a modificación do código penal ou ben as novas taxas". O militante da CIG é partidario de manter a campaña contra a represión sindical "pois hai motivos de abondo"
