A sanción confírmase. A Delegación do Goberno rexeita probas e testemuñas achegadas pola plataforma e continúa facéndoa responsábel das pintadas aparecidas despois da manifestación do 17 de maio. Segundo o escrito da Delegación de Goberno, un policía que se paseou polas rúas de Santiago antes da mobilización non viu as pintadas que si estaban ao remate da marcha. A conclusión é que Queremos Galego é responsábel malia non ter ningunha proba que identifique a algunha persoa da plataforma realizándoas. “Se isto for verdade, o cal habería que analizar con moita cautela, tamén nos temos que preguntar por que din agora que houbo ese suposto paseo policial e non achegaban esa información desde o comezo do procedemento sancionador”, sinalou Carlos Callón.
A notificación da multa a Queremos Galego chegou canda as que recibiron outras entidades que neste ano convocaron mobilizacións en Compostela, entre elas, a Plataforma polo Dereito ao Aborto. Os escritos recibidos son idénticos e mesmo se chega a acusar a varias organizacións da mesma pintada. “Demostra que aquí non hai máis que un copia e pega por parte da Delegación do Goberno para criminalizar os movementos sociais que contestan as políticas do PP, o que eles consideran a súa lista de sospeitosos habituais”, defenden desde Queremos Galego.
Retrocesos dos dereitos sociais
A sanción toma parte, segundo Callón, dun proceso de retroceso nos dereitos sociais desenvolvido polo PP que leva, no caso da lingua a tempo nos que “estaba proscrito ou indefenso e a mobilización social era criminalizada sistematicamente”. Para Queremos Galego, o PP tenta ano tras ano, evitar as mobilizacións na defensa da lingua e agora saben que cada convocatoria “se pode traducir en sancións inxustas, baseadas en argumentos falaces e claramente antidemocráticas”. Avisan tamén de que a chamada “Lei de Seguridade Cidadá” podería “chegar a tentar evitar a mobilización cidadá do Día das Letras en 2014”, alertou Carlos Callón nunha convocatoria que partillou con Bieito Lobeira, Marcos Maceira e Carlos García Vieito, membros de Queremos Galego.