Unha faixa inmensa na fachada principal da catedral de Santiago reclamou ás 12 deste día 12 de outubro soberanía para Galiza. Como en Compostela, nas sete cidades galegas centos de persoas participaron nunha acción sorpresa da iniciativa social "Galiza pola soberanía", co fin de facer pública a vontade de construción dun Estado galego na data emblemática do imperialismo español.
Faixas, pancartas e cartaces nos que se pode ler o lema “Galiza pola Soberanía” pendurados por todo o país son os ingredientes básicos do vídeo que hoxe 12 de outubro pendurou na rede a iniciativa social Galiza pola Soberanía, nunha xornada de especial destaque para a plataforma que está a cobrar novo pulso e escolle esta significativa data para saír de novo ao ámbito público. O audiovisual onde se contemplará unha vontade colectiva de construción da nación hase de publicar na páxina da plataforma máis nas redes sociais.
Fragmentos de 5 segundos de gravacións enviadas por persoas desde o país enteiro xúntanse para compoñer a montaxe deste audiovisual que é unha das primeiras cartas de presentación da plataforma, que naceu cun manifesto fundacional apoiado por duascentas persoas e se presentou no pasado mes de xullo en Compostela.
Galiza pola Soberanía fai, no seu manifesto fundacional, un chamamento a promover “o debate, a axitación social e a mobilización, a tomada de consciencia da maioría do pobo galego no proceso de construción nacional, co obxectivo final de camiñarmos cara á unha situación de soberanía plena, fixada na consecución dun Estado Galego, antipatriarcal, social, laico e radicalmente democrático con base nunha república para construírmos, de maneira pacífica e solidaria, unha sociedade xusta, libre e verdadeiramente igualitaria”.
