Unha delegación de gandeir@s concentráronse ás portas do edificio da Xunta en Lugo para denunciaren os impagos que están a padecer como consecuencia da "quebra técnica" de Alimentos Lácteos S.L. Neste senso, a Federación rural galega denuncia que "dos 15 millóns de euros" que adebeda a factoría situada na Terra Chá, boa parte correspóndense con impagos de até 4 meses ás explotacións gandeiras e cooperativas asociadas á factoría impulsada pola Xunta de Núñez Feijóo.
Perante a grave situación que está a viver o sector lácteo galego --vítima de prezos situados por debaixo dos custos de produción-- desde a Fruga denuncian o desleixo da Xunta de Galiza e advirten que continuarán a se mobilizaren "até que consigamos o cobro dos cartos que se nos adebedan". Neste sentido, solicitaron unha reunión urxente coa conselleira de Medio Rural e do Mar á fin de transmitírelles "directamente a nosa preocupación" para quebra de Alimentos Lácteos.
