Galiza
Novo exame para Feijóo
Novos dados do caso Feijóo, subministrados neste caso por el mesmo na conferencia de imprensa após o Consello de Ministros.
Feijóo informou hoxe de que a Administración galega, no período 2009-2012, con el como presidente, facturou arredor de 5.000 euros con empresas de Dorado. A esa altura, Dorado xa fora condenado por narcotráfico. Quen fora amigo de Feijóo nos 90 -e que mantivo a relación telefónica no mínimo até o 2003- foi procesado polo xuíz Taín en 2003.
Así o recoñecía o propio presidente da Xunta de Galiza en comparecencia de imprensa. Após o Consello da Xunta, Alberto Núñez Feijóo explicaba máis devagar unha das acusacións lanzadas contra os grupos da oposición no debate parlamentar da pasada cuarta feira. O líder do executivo galego daba conta das subvencións e relacións económicas entre a administración galega e as empresas do narcotraficante Marcial Dorado. Neste senso, Feijóo recoñeceu que durante a súa primeira lexislatura á fronte da Xunta, o goberno galego pagara facturas en concepto de servizos prestados a empresas titularidade de Dorado, por valor de 5.000 euros.
Feijóo recoñece ter pagado 5.000 euros a empresas de Marcial Dorado en facturas pola prestación de servizos á Xunta
Os pagamentos corresponderían ao período 2009-2012, cando o sonado narcotraficante xa fora condenado e ficaba en prisión. Malia que Alberto Núñez Feijóo procurou sacarlle ferro á revelación argüíndo que non son o mesmo "facturas que subvencións" o certo é que Xunta mantivo unha relación contractual con algunha das empresas de Dorado sendo este xa xulgado e condenado.
A estratexia do "e ti máis" que Núñez Feijóo tende a empregar cando debe xustificar a súa acción de goberno, dirixiuse nesta ocasión ás subvencións supostamente percibidas polas empresas de Dorado durante o goberno bipartito. Neste senso, o presidente da Xunta asegurou que o narcotraficante tería percibido unha subvención de 125 mil euros "por solidariedade cos danos nas instalacións da súa empresa". Non aclarou máis o líder do executivo mais si aproveitou para acusar á oposición de practicar "a hipocrisía política" ao denunciar o seu suposto coñecemento das actividades delictivas de Dorado e autorizar --segundo Núñez Feijóo-- axudas ás empresas do narco.
Alberto Núñez Feijóo insistiu en varias ocasións que os datos achegados, após as súas declaracións na comparecencia parlamentar, non tiñan por obxecto "pór en dúbida a legalidade" desas concesións --quer en forma d axudas/subvencións, quer co pagamento de facturas-- senón, dixo,"denunciar" a actitude hipócrita de PSdeG e BNG.
O presidente da Xunta rexeita aclarar o diñeiro percibido por Dorado durante os 16 anos de Goberno Fraga
Ambos os dous grupos parlamentares exixen agora ao presidente da Xunta que presente á Fiscalía a documentación que dá conta dos pagamentos outorgados pola administración ás empresas do narco. Porén, Feijóo retrucou con rentranca "quere o bipartito que o leve á Fiscalía?".
Nin un só dato da época Fraga
Unha das preguntas máis recorrentes arredor das relacións contractuais entre Marcial Dorado e a Xunta de Galiza correspondía ao período correspondente aos gobernos de Manuel Fraga. Naquela altura en que Feijóo era o segundo nome na consellaría de Sanidade e mantiña unha relación de amizade co narco arousán. Mais o líder do executivo galego rexeitou en varias ocasións responder ás preguntas d@s xornalistas asegurando que todo se sabería no seu momento. "Quere sabelo vostede antes que o Parlamento?" lle inquiría o presidente da Xunta a un xornalista. Pois o certo é que a imprensa quería completar a información feita pública polo propio Núñez Feijóo mais el, deu por concluída a rolda de imprensa.
"Revisen os vídeos da comparecencia de onte", dicía con sorna o presidente ao tempo que aseguraba "unha segunda comparecencia non me parece oportuna, onte xa respondín a 23 preguntas e elas me remito".
