“Propoñémoslle que acepte Galiza como parte integral de Reino Unido se Escocia opta pola independencia en 2014”. Eis a proposta que o vigués Antonio Formoso Cores fai desde Vigo, e a través de change.org, ao primeiro ministro británico, David Cameron. Ridiculismo, retranca política, desexo arredista peneirado polo humor, cabreo após a sentenza da xustiza española sobre o Prestige ou simplemente gañas de brincadeira? Cada quen que risque a opción que lle chiste (ou que lle proa).
Unha proposta coa que tamén Reino Unido sairía gañando, pois Galiza é unha agradábel sorpresa. Unha opción para cubrir o baleiro da marcha de Escocia. Para comezar, temos gaiteiros (coma os escoceses). Mais a listaxe inclúe moitos puntos en común, citados polo impulsor da idea: se eles teñen o Celtic de Glasgow, “nós, o Celta de Vigo”. "Bebemos tanto ou máis que os escoceses", ambas as dúas son “atlantic countries”, nos dous países chove a eito, as bandeiras son de cores semellantes (co branco e azul), unha identidade propia moi forte.
Que somos do melloriño!
Na petición enumérase toda unha serie de cuestións coas que a Vella Albión sairía gañando de aceptar a Galiza: desde ter xente que sabe traballar duro até poder acceder a comidas e bebidas deliciosas, pasando pola potencia económica (pesca, textil...) ou, mesmo, conta coa mellor praia do mundo: Praia de Rodas, nas Cíes.
