Concentracións diante distintas sedes da Axencia Tributaria despiden esta cuarta feira a campaña da Renda-2013. As Plataformas de Emigrantes Retornados insisten desta maneira nas súas reivindicacións de conseguir por parte da Axencia Tributaria un trato igualitario co resto do colectivo de xubilad@s.
As Plataformas fechan a campaña tributaria nun ano no que se repetiron as mobilizacións que serán simultaneas en distintas cidades galegas, entre elas Vigo e A Coruña. Emigrantes insisten en que se lle está a dar un trato de “defraudadores”, con imposicións de sancións cando “existen resolucións do Tribunal Económico Administrativo e sentenzas do Tribunal Superior de Xustiza de Galiza que acreditan a dificultade de interpretación da norma en correlación con diferentes tratados bilaterais”. Segundo destacan, a desinformación foi indirectamente recoñecida pola Axencia Tributara ao incluír no exercicio fiscal que agora remata a indicación de obriga de incluír cantidades percibidas no exterior. A campaña que esta semana chega ao seu fin é a primeira na que se incluíu esta información.
Lamentan tamén que o goberno non atenda a iniciativa aprobada unanimemente no Parlamento de Galicia e esixen que se eliminen as sancións impostas e que poña fin ao trato discriminatorio en materia fiscal para quen tivo que abandonar o país na busca de traballo.
