En maio de 2013, familiares do preso independentista Xurxo R. Olveira denunciaban ter sufrido un “trato vexatorio” por funcionarios do penal de Mansilla de las Mulas. Obrigaron a nai e a irmá do preso a se despoxaren das súas roupas para as submeter a unha inspección manual namentres un can da Garda Civil lles uliscaba as roupas; segundo a versión da propia familia a través da plataforma Que Voltem a Casa
Queixa de Esculca
Estes feitos motivaron que Esculca, Observatorio para a defensa dos dereitos e liberdades, presentase en 22 de maio unha queixa perante o Valedor do Pobo e o Defensor del Pueblo. Pedían que “se tramitasse queixa pola alegada actuaçom abusiva de funcionários do centro penitenciária, que teriam submetidos sem causa justificada as familiares do preso a exames corporais integrais e outras vexaçons”.
A principios deste mes de agosto, o Defensor del Pueblo comunicou a Xurxo R. Olveira a apertura de dilixencias perante a Secretaría Xeral de Institucións Penitenciarias para reunir e recabar información sobre o que aconteceu ese día.
Case un ano preso e sen xuízo
Xurxo R. Olveira fica en prisión preventiva sen ser xulgado desde setembro de 2012. Impútanlle un delito de "pertenza" á organización Resistencia Galega, que o ministerio de Interior ten tipificada como "terrorista"