Este último auto feito público pola Audiencia provincial da Coruña deixa sen imputacións a Adif. O xuíz instrutor do caso, Luís Aláez, chamara a declarar en calidade de imputados aos ex-presidentes do Consello de administración desde 2011 e demais responsábeis de Adif que tiveran a ver coa decisión de omitir o sistema de freado ERTMS no Alvia sinistrado o pasado 24 de xullo.
Porén, e após resolver o recurso de apelación presentado por un dos imputados --e que se fai extensíbel aos outros 22 directivos-- a Audiencia da Coruña revogou o auto emitido previamente e deixa sen efecto as imputacións.
Con este auto, a Audiencia provincial revoga as imputacións dos 22 cargos de Adif e deixa só ao maquinista
Ao igual que no auto emitido a pasada segunda feira en relación cos cinco técnicos, a Audiencia provincial considera que "non bastaría" co feito de "desenvolver cometidos en materia de seguridade" para lles atribuíren a condición de imputados. Neste senso, o tribunal considera que a argumentación empregada polo xuíz Aláez é insuficiente e mesmo "prematura" polo que revoga o fallo emitido o pasado mes de setembro.
Con este último auto fican levantadas as imputacións a Adif incluída a que atinxía ao actual presidente da xestora, Gonzalo Ferre.
As vítimas agrupadas na Asociación de Afectad@s polo sinistro xa expresou a súa "perplexidade" após coñecer o fallo. O seu presidente di que, embora respectar a decisión, non comprenden o contido do auto e aseguran que as imputacións dos directivos de Adif contribuían a "esclarecer" o acontecido no accidente mais tamén, "a evitar que volva acontecer".