Pescanova volvía cotizar esta segunda feira en bolsa após a suspensión da sexta pasada e o anuncio do preconcurso de acreedores. E non foi un retorno agradábel. En primeiro lugar, pola fervenza de ordes de venda de títulos desta compañía que levou a que só se permitisen as vendas no minuto previo ao peche da sesión. E en segundo lugar, polo desplome das accións: de 17,40 euros a 6.96. Unha queda de por volta do 60%.
O inesperado anuncio do preconcurso puxo patas arriba os círculos económicos tanto galegos como do Estado español. Unha firma como Pescanova, con máis de 10.000 empregos no mundo, un 10% deles na Galiza, e non ligada o tixolo, que entrase en dificultades, acendeu o sinal de alarma. Á hora de analizar as dificultades, non poucos lembran a aposta pola expansión en acuicultura da compañía (con fortes investimentos e empréstitos) como motivo.
Ampliación de capital e débeda
Pescanova fixo en 2012 unha ampliación de capital de 124,9 millóns de euros para reforzar os seus recursos propios e coa finalidade de afortalar a súa estrutura e diminuír o seu nivel de endebedamento. O pasivo de Pescanova rolda os 1.500 millóns de euros a finais de 2012, dos cales 459 millóns corresponden a acreedores comerciais