Abel Caballero alerta de que Almunia pode estar a preparar un "golpe de man" contra o naval de Vigo

O alcalde de Vigo, Abel Caballero, chama á Xunta e ao goberno do Estado -en mans do PP- a que se movan para evitar unha eventual decisión do comisario da Competencia, Joaquín Almunia, en relación ao tax lease que sexa contraria aos intereses do naval de Vigo.

Atacar a Almunia, como único responsábel das desventuras do naval galego, é xa todo un clásico desde as fileiras do PP. Agora súmase a esta liña discursiva o alcalde de Vigo, compañeiro de partido do comisario da Competencia.

Nunha entrevista nas emisoras galegas da SER, o alcalde de Vigo alertou contra a hipótese de que Almunia poda vir a dar o "golpe de graza" contra o naval vigués, ao adoptar unha resolución sobre o tax lease que impida aos esteleiros da cidade olívica teren opcións de competir en pé de igualdade con factorías ubicadas noutros Estados europeus.

Caballero demanda que os gobernos galego e estatal compoñan unha "frente común" para disuadir a Almunia de que adopte determinacións que resulten contrarias aos intereses do naval vigués.

O alcalde de Vigo manifestou que Almunia coñece a súa posición a respeito deste asunto.

Comentarios