O número de persoas que viven en situación de precariedade económica na Galiza ascende xa a 600.000, segundo datos dun recente estudo realizado pola European Anti Porverty Network (EAPN). Alén diso, unhas 100.000 persoas están afectadas pola pobreza severa no noso país. Así mesmo, a subsistencia dunha de cada tres familias da Galiza depende das pensións de xubilación ou das prestacións por desemprego, segundo o estudo do Instituto Galego de Estatística citado.
Canto á situación a nivel estatal, a cifra de persoas que viven de forma precaria elévase xa aos 10 millóns, segundo EAPN, mentres que o dato sitúase en 17.000 afectados cando a referencia é a capital da Galiza, Santiago de Compostela.
Cómpre lembrar que o 27% das persoas asalariadas en Galiza percibiron como máximo o SMI (un 15 % apenas a metade deste). Conxuntamente recibiron o 6% do total da masa salarial das galegas/os. O 1,5% das persoas asalariadas en Galiza de maiores ingresos (máis de 7,5 veces o SMI) percibiu o 7,7% do total das rendas salariais galegas. Os números falan por si propios: o 1,5% das persoas asalariadas de maiores ingresos acaparan unha maior porción da masa salarial que o 27% de menores ingresos-
Alén diso, os datos do Instituto Galego de Estadísticas indican que o 18 por cento dos fogares galegos con nen@s ao cargo viven por baixo da liña de pobreza. E no caso daqueles lares onde viven só un adulto e unha crianza, esa porcentaxe elévase até rozar o 50%.
