Haberá ampliación
Pola volta de medio cento de persoas participarán de xeito rotatorio desde esta sexta e até o vindeiro 14 de decembro na folga de fame que a CIG vén de impulsar en apoio e solidariedade cos tres sindicalistas (Marcos Cadórniga e Carlos Alján, da CIG, e Carlos Búa, de CCOO) condenados a tres anos e un día de cárcere cada un por tomar parte na folga de alimentación e comercio de Pontevedra en 2009. Desde esta sexta e até o 14 realizaranse quendas de dous días, coa participación de dúas persoas en cada quenda, número que se ampliará a tres perante a gran demanda de persoas que queren tomar parte nesta protesta simbólica contra a criminalización e represión sindical.
Nos últimos meses sucedéronse sentenzas con fortes condenas contra sindicalistas, nomeadamente da CIG
A primeira quenda será realizada, fronte á Audiencia Provincial de Pontevedra, polo secretario xeral da CIG, Suso Seixo, e Marcos Cadórniga, un dos sindicalistas condeados. Na segunda, tomarán parte o secretario comarcal da central nacionalista en Pontevedra, Rafael Iglesias, e Carlos Alján, outro dos condeados. E así, sucesivamente, iranse realizando as quendas. A partir da vindeira segunda feira, día 26, sumaranse a esta folga de fame afiliad@s de CCOO. UGT analizará na súa comisión se tamén dá o paso de adherirse á esta folga.
A partir da vindeira segunda feira, día 26, sumaranse a esta folga de fame afiliad@s de CCOO
Concentracións e manifestación
Mais a folga de fame non é o único acto que se vai desenvolver nestas semanas en apoio aos sindicalistas condenados e como denuncia da situación de criminalización e represión do movemento social que se está a dar en paralelo ao aumento do malestar social e das protestas cidadás pola crise. Así, o vindeiro 4 de decembro realizaranse concentracións perante os xulgados das sete principais cidades galegas.
E o 15 de decembro, e como remate da folga de fame, Pontevedra acollerá unha manifestación nacional en apoio aos sindicalistas represaliados e para evidenciar o rexeitamento sindical a un escenario de recortes e ataques aos dereitos e liberdades sindicais.
Cadórniga, Aljan e Búa: impedir a loita sindical en tempos de amplo malestar social
O Xulgado do Penal nº 1 de Pontevedra fixo pública a principios de xullo a sentenza pola cal se condenaba a tres anos e un día de prisión a Marcos Cadórniga, liberado sindical de CIG-Servizos, Carlos Alján, delegado da central sindical nacionalista en Froiz e o sindicalista de CCOO Carlos Búa, pola súa particiación na folga de comercio de alimentación en 2009. Unha sentenza que a executiva da central nacionalista xa avaliara entón como absolutamente desmedida e que entendía que tiña como obxectivo criminalizar o sindicalismo e limitar a súa capacidade de actuación na defensa dos dereitos das traballadoras e traballadores.