A piques de se celebrar o Congreso constituínte --que terá lugar o 23 de febreiro, as bases de Sortu debaterán e votarán esta fin de semana as persoas que tomarán parte do Consello Nacional da nova organización da esquerda abertzale.
Segundo informa GARA, a proposta que se someterá a votación vai escabezada polo deputado da CAV, Hasier Arraiz quen optará á presidencia de Sortu. Arraiz foi membro da Mesa nacional de Batasuna e actualmente é parlamentar de EH Bildu no Parlamento vasco. Xunto a el, Idoia Aiastui (Responsábel de Organización interna), Juan Joxe Petrikorena (Responsábel de Comunicación), Marisa Alejandro (Responsábel de finanzas), Maite Ubiria (Responsábel de Relacións Internacionais). A súa elección ou rexeitamento deberá producirse en bloque. De saíren adiante, a súa ratificación producirase no Congreso Constituínte que terá lugar en Iruñea.
Nesta relación de persoas, a proposta presentada polas localidades abrangue un outro cargo de responsabilidade. Porén, a secretaría xeral ficará vacante após proporen maioritariamente desde as bases o nome de Arnaldo Otegi para exercer como secretario xeral de Sortu. Otegi permanece detido na prisión de Logroño desde 2009.
A composición final do máximo órgano de dirección entre asembleas completarase coa elección das responsabilidades de loita de masas, loita institucional e loita ideolóxica. Tamén así coas portavocías e coa responsabilidade para a resolución do conflito. Aliás, posteriormente sumaranse @s responsábeis de cada herrialde e das localidades de Euskal Herria.