Un total de 245 localidades acolleron en Euskal Herria actos enmarcados na iniciativa Goazen Plazara, convocada por Herrira, e aos que asistiron miles de persoas en defensa dos dereitos d@s pres@s polític@s e para reclamaren aos Gobernos español e francés que abandonen o inmobilismo. O mal tempo non rebaixou unha cifra de asistencia que sorprendeu até a propia organización. E é que á falta de contabilizar todas as concentracións realizadas, estiman en 28.500 as persoas que se botaron á rúa para exixiren o respecto dos dereitos deste colectivo.
"Non se poden mesturar os dereitos fundamentais que teñen @s pres@s con cuestións políticas", reclamaron desde Herrira, chamando a non esquecermos que tales dereitos corresponden a todas as persoas "aínda que fiquen presas". Criticaron a "cadea perpetua encuberta" que se aplica a día de hoxe no Estado español, e informaron de que 50 desas persoas cumpriron xa a pena imposta e que 14 delas padecen enfermidades "graves", polo que a súa posta en liberdade é "urxente".
Arremeteron tamén contra a dispersión, que obriga a familiares e amig@s a realizar viaxes de 1.000, 1.500 ou 2.000 quilómetros e de 10, 20 ou 25 horas de duración cada fin de semana. Esas viaxes custáronlles xa 16 vidas. Nesta mesma liña, queixáronse de que o ministro do Interior "día si e día tamén" faga "apoloxía" da dispersión e dunha política penal de excepción, "deixando en evidencia que son decisións políticas", pois a lexislación española "non di onde teñen que estar encarcerad@s @s pres@s".
A demanda de respecto dos dereitos das persoas presas non se limitou ao interior de Euskal Herria, xa que tamén levaron a cabo mobilizacións en lugares como Buenos Aires, Londres, Terrassa, Lisboa ou Bruxelas. En moitos deses actos, en case todos, unha cadeira baleira simbolizou que nesas concentracións non estaban tod@s.