José Martínez: "Fraga destruíu a unidade que había entre as entidades galegas do exilio"

Falar con José Martínez-Romero Gandos é recuperar, en certa maneira, unha parte da memoria da emigración. Viviu a evolución das entidades galegas en Bos Aires desde dentro ao tempo que exercía como psicólogo nuns tempos complicados para a sociedade arxentina. Tratou de maneira directa un dos grandes persoeiros da cultura galega, Luís Seoane, e tamén partillou experiencias terapéuticas cun dos seus grandes referentes mundiais: Viktor Frankl. Ambos marcaron a súa vida e a súa obra.