Veñen de presentar as candidaturas do BNG para as eleccións. En que clima interno se elaboraron?
As listas do BNG son froito dun proceso envexábel, un proceso democrático e de participación de toda a militancia que nas asembleas comarcais achegou propostas daquelas persoas que consideraban debía formar parte das candidaturas. A executiva nacional elaborou con esas propostas a súa e logo volveu ser a propia militancia a que ratificou as listas. Disto, outras forzas políticas non poden presumir nin moitísimo menos. No BNG non só falamos de democracia senón que a practicamos coa participación directa da militancia.
Están, logo, superadas as tensións xurdidas na Asemblea de Amio?
O BNG é obvio que se atopa nun bo momento e temos referencias próximas no tempo que o constata, como pode ser a Convención Nacional celebrada en maio ou o 25 de xullo, onde se puido palpar con absoluta nitidez cal é o estado de ánimo da militancia, que está moi ilusionada e moi cohesionada. Contamos cunha organización moi engraxada e acorde coa liña política que está a levar o BNG. Esta situación é moi satisfactoria para nós.
As listas do BNG son froito dun proceso democrático e de participación da militancia
Novamente apostan por listaxes paritarias en xénero, porén nas candidaturas encabezan as listas tres homes.
No BNG non só nos limitamos a cumprir os mandatos paritarios recollidos na lexislación, senón que imos, normalmente máis alá. É certo que temos un candidato á presidencia da Xunta mais a número dous pola circunscrición da Coruña, Ana Pontón, vai exercer practicamente como candidata e logo a dúas e tres de Pontevedra, Coruña e Lugo son mulleres, é dicir, que se botamos unha ollada ao primeiro tramo, as cinco primeiras persoas de todas as listas, no BNG temos unha proporción do cincuenta-cincuenta. Creo que é unha proporción moi satisfactoria tamén.
Salienta a importante presenza de candidat@s que proveñen dos movementos sociais e do sindicalismo. Que mensaxe quere trasladar o BNG con esa decisión?
O BNG non concibe a campaña electoral como un paréntese entre o que se fai antes da campaña e do que se pensa facer despois de se celebraren as eleccións. Non concibimos a campaña coma un proceso de amnesia ao querer trasladar aos galegos e galegas unha imaxe que non se corresponde co que vimos traballando. No BNG, levamos xa moitos meses cun traballo moi constante coa cidadanía encamiñado a estar do lado das maiorías sociais que están a padecer a crise, traballando con eles cóbado con cóbado. Neste senso, nos actos que estamos a desenvolver procuramos darlles voz a eses sectores, non só nos diriximos a eles senón que, desde a nosa capacidade para organizarmos actos tentamos que a cidadanía aproveite eses espazos para trasladar as súas reivindicacións e o traballo que están a facer. Desde logo nas listas tamén quixemos que isto se reflectise e que estivesen presentes.
Jorquera sinalou estes días a necesidade dunha maior mobilización social, invocando o "Nunca Máis". Cal é o significado hoxe daquel espírito?
É evidente que o necesario é sumar esforzos [referíndose á campaña electoral] como reflicte o lema elixido, [“En bloque podemos!”]. Somos conscientes de que en bloque, colectivamente, é posíbel derrotar esas políticas e actuacións que por parte da dereita e dos grandes poderes económicos e financeiros están tentando poñer en marcha. Neste senso, Nunca Máis foi un exemplo precisamente diso, dunha mobilización colectiva, dun pobo o galego, que se rebelou contra unha situación que era totalmente inxusta na que se vía unha deixadez por parte de quen tiña a obriga de actuar, e neste momento estamos a padecer esa situación. A realidade de miles de galegos e galegas é dramática, entrementres estamos a ver como por parte do Partido Popular na Xunta de Galiza non se está a facer nada. Polo cal, no BNG aspiramos a ser o referente da Galiza que se move, que se rebela e que se opón contra á privatización do ensino e a sanidade, que se rebela contra a estafa das preferentes, que demanda carga de traballo para os estaleiros... Por iso, facemos un chamamento a que a indignación e o cabreo que se sente, se converta en acción como se fixo no Nunca Máis. E para nós esa acción ten que ser apoiar ao BNG.
A realidade de miles de galegos e galegas é dramática, entrementres o Partido Popular non está a facer nada
Cales son as impresións e sensacións que tiran destas semanas de precampaña?
Observamos unha moi boa aceptación das nosas propostas, pois está a acudir moita xente aos actos que organizamos, asemade tamén hai moita xente que nos traslada a necesidade dun cambio real, non só de goberno, senón das políticas que se veñen desenvolvendo, a necesidade de plantarmos cara a todas as medidas que rouban as conquistas alcanzadas ao longo da historia. Tamén observamos que o Partido Popular vai intentar ir cara a unha campaña que non estea centrada nas propostas pois non ten balance que presentar á cidadanía. Semella máis que obvio que en tres anos e medio de lexislatura o balance co que se presenta Feijóo é tremendo, co maior número de persoas desempregadas da historia de Galiza, intentando presumir do que non ten, de control do défice cando no primeiro semestre de 2012 Galiza é a quinta comunidade do Estado con maior défice, tenta presumir de control do gasto mais ao longo da súa lexislatura a débeda pasou de 3000 millóns de euros a case 8000, a realidade dun sector industrial practicamente esmorecendo, o sector leiteiro.... non ten balance que presentar polo que irá a unha campaña cun programa oculto como fixeron nas eleccións xerais, sen explicarlle á cidadanía o que teñen pensado facer e ao día seguinte das eleccións, se teñen capacidade para gobernar, aplicarán máis recortes e medidas lesivas para a cidadanía. Ademais cremos que están a levar a cabo unha campaña para “embarrar o campo” e intentar dispersar a atención cara a cuestións totalmente secundarias, no cal é experto o PP, xa o fixo en 2009 e a nosa impresión é que leva todo o camiño de facelo nesta campaña.
Estades a lles dar moita importancia ás redes sociais na campaña, mesmo sacastes a serie #feijóomentirán que circula pola rede...
As novas tecnoloxías son unha ferramenta que permite a inmediatez e polo tanto, o contacto directo con moitos cidadáns. En concreto, o BNG, tanto en Facebook coma no Twitter ten unha importante actividade se o comparamos coas outras dúa forzas políticas con representación parlamentar, e efectivamente, a nosa páxina web é tamén un elemento ao que lle damos bastante importancia como instrumento para darmos a coñecer as nosas posicións. Agora, vimos de quitar unha serie de videos cos que queremos evidenciar que este mantra que está a repetir Feijóo é unha mentira a todos os galegos e galegas. Cae antes un mentirán que un coxo e neses videos está a proba palpábel de que lle mente á cidadanía galega e parécenos que, ademáis de incumprir o seu programa electoral co que se presentou en 2009 como un compromiso con eles, agora procura volvelos enganar. Con esta campaña queremos que as galegas e galegos vexan cales foron as súas promesas e como as foi incumprindo unha por unha.
Queremos evidenciar que cae antes un mentirán que un coxo e #feijóomentirán é a proba palpábel de que lle mente á cidadanía
O Consello Nacional do pasado sábado aprobou tamén o programa electoral. Cales son as súas principais propostas?
O fundamental é facermos unha oferta programática a Galiza, á súa xente, no sentido de termos confianza nas capacidades de Galiza e na necesidade de crermos nelas. Neste senso, reclamamos soberanía para alcanzarmos un maior desenvolvemento económico en beneficio das maiorías sociais. É fundamental en momentos coma estes, dunha recentralización brutal por parte do Estado onde as decisión se toman cada vez en ámbitos máis afastados da Galiza, o preciso é ter soberanía, capacidade de decisión e autogoberno real para poder pór en marcha desde os nosos intereses todas aquelas medidas encamiñadas a desenvolver as nosas potencialidades, que son moitas. Logo, apostamos pola confianza no público, é dicir, a defensa de todos os servizos sociais, imprescindíbeis para o equilibrio e a igualdade real entre as persoas. Tamén defendemos a intervención pública. É necesario que as decisións as tomen aqueles que se presentan ás eleccións, os representantes dos cidadáns e non os que non se presentan. No noso programa facemos moito fincapé no autogoberno real, pois está en xogo o futuro de Galiza como nación, e tamén, na rexeneración da democracia e o avanzo nas liberdades. O noso obxectivo é favorecer a participación cidadá, polo que propoñemos unha lei de consultas populares e a modificación da lei que rexe a CRTVG, cuestións arredor desa necesidade de que a democracia non sexa só unha palabra senón que sexa algo real.