mércores 14/04/21

Silencio do Goberno español sobre a proposta de producir na Galiza a Sputnik V

Zendal e Iberatlantic aspiran a producir na Galiza a vacina rusa contra a Covid-19. O Goberno español garda silencio após reunirse coa delegación rusa.

Un traballador da saúde na Arxentina amosa unha das doses da vacina rusa contra o coronavirus Sputnik V (Foto: Alan Monzon / ZUMA Wire)
Un traballador da saúde na Arxentina amosa unha das doses da vacina rusa contra o coronavirus Sputnik V (Foto: Alan Monzon / ZUMA Wire)

Galiza está lonxe de alcanzar o ritmo de vacinación necesario para acadar antes do verán a chamada inmunidade de grupo. Detrás desta realidade está a falla de vacinas para administrar á poboación. Actualmente están autorizadas as de Pfizer, Moderna e AstraZeneca, ás que se sumarán nos próximos meses a de Janssen (prevista para abril) e a de Novavax no mes de xuño. Esta última terá selo galego, xa que o grupo Zendal, a través da súa filial Biofabri, producirá na planta do Porriño o antíxeno desta vacina. De feito, Zendal é único laboratorio do Estado español con licenza para producir vacinas de uso humano de forma integral.

Esta potencialidade é a que quere aproveitar agora o propio grupo porriñés e a empresa Iberatlantic para fabricar na Galiza a vacina rusa Gam-COVID-Vam, máis coñecida como Sputnik V. Esta vacina, desenvolvida polo Instituto de Investigación Gamelaya e comercializada polo fondo soberano ruso Russian Direct Investment Fund (RDIF), demostrou unha efectividade de 92% contra o virus SARS-CoV-2 no seu estudo en Fase III.

Como explica a Nós Diario o máximo directivo de Iberatlantic, Pedro Mouriño, ambas as empresas puxéronse en contacto co Ministerio de Industria e coa parte rusa para pedirlles que incluísen esta cuestión na axenda da X Sesión da Comisión Mixta Intergobernamental Rusia-España que decorreu o pasado 26 de febreiro.

Sen novas do Ministerio

Segundo puideron saber, foi a parte rusa a que sacou o tema, mais a día de hoxe seguen sen recibir "nin unha chamada" do Ministerio. "Dá a impresión de que teñen todo controlado e non é así", afirma Mouriño, quen lembra que ao ritmo actual (está vacinado algo máis de 3% da poboación) é imposíbel chegar a xuño con 70% da poboación inoculada. Porén, no caso de que se autorizase a produción da vacina na Galiza, a partir do verán terían capacidade para fabricar 16 millóns de vacinas ao mes, o que suporía "arranxar o problema da falta de subministración no mes de setembro". Ademais, aclara que o excedente se podería exportar, xerando así máis riqueza para o país.

De aí que lle sorprenda "a falla de iniciativa" do Goberno español a este respecto. "Aínda está en proceso a análise por parte de Rusia para verificar que a produción é posíbel. A capacidade técnica está aí e a experiencia tamén. A nosa contraparte (por Zendal) xa ten un nome e no último mes foi visitada por tres ministros, por iso nos estraña que nin descolguen o teléfono para preguntar", lamenta o directivo de Iberatlantic. De momento hai marxe de manobra, pero é moito o que está en xogo. "Estamos abrindo a porta a converter Galiza nun hub de entrada da industria farmacéutica rusa", destaca Mouriño. No caso concreto da vacina, se compran a vacina para España e Portugal poderían obter uns 160 millóns de euros ao mes pola venda dos 16 millóns de doses que poderían producir, e parte deles quedarían na Galiza en forma de taxas e emprego. "En calquera dos dous horizontes, mera produción ou licenciatarios, estamos falando de cantidades que dan un salto cualitativo á industria farmacéutica na Galiza", conclúe.

Sen necesidade de agardar polo plácet da axencia europea

A vacina Sputnik V conta na actualidade con 36 autorizacións sanitarias para a súa distribución por todo o mundo, máis que Moderna e só superada polas de Pfizer e AstraZeneca. Entre eses países hai tres comunitarios: Hungría, Eslovaquia e República Checa que a están a importar directamente de Rusia. Como explica Pedro Mouriño, non é necesario agardar polo visto e prace da Axencia Europea do Medicamento. De feito, 85% dos fármacos que se comercializan no Estado español carecen desta autorización. A Axencia Española do Medicamento tería competencia para cursar pola vía de urxencia unha autorización para distribuíla en España (exclusivamente) que "é cuestión de días", apunta Mouriño. Pódese facer se hai vontade política e está xustificada a súa utilidade, como así parece.

comentarios