A Xunta pon en dúbida o éxito dos proxectos galegos que optan aos fondos europeos

A candidatura galega para o programa Next Generation está formada por 354 proxectos, cun investimento total de 19.698 millóns de euros. A proposta recolle 107 iniciativas impulsadas desde os operadores privados e 247 promovidas desde a Xunta da Galiza. A maiores dos proxectos integrados no programa avalado polo Goberno galego, atópase toda unha serie de actuacións propostas polas grandes compañías do IBEX para desenvolver na Galiza e que van ser presentadas directamente ao Executivo estatal. O vicepresidente segundo e responsábel da área económica do Goberno, Francisco Conde, ten sinalado que 126 proxectos están vinculados coa “economía circular e a transición enerxética”; 71 coa “cadea de valor mar-industria, agroindustria e ligada ao crecemento cohesionado”; 69 vinculados ao “eido sanitario, aos modos de vida saudábeis e á nova economía dos coidados”; 56 aos “hubs de innovación dixital, á industria 4.0 e ás TIC”; e 32 á “mobilidade sustentábel”. Os operadores privados galegos A Xunta da Galiza continúa negándose a facer pública a relacións de proxectos promovidos desde o sector privado e incorporados á candidatura galega para o programa Next Generation. Porén, nos últimos tempos están transcendendo o contido dalgúns deles, liderados nalgún caso por compañías de relevo no ámbito empresarial galego. Así, a gasística Reganosa, participada maioritariamente polo Grupo Toxeiro, presenta unha proposta en parcería co Goberno galego para erguer unha planta de xeración de hidróxeno no concello das Pontes. A biotecnóloxica Zendal está detrás doutro dos proxectos. A histórica compañía farmacéutica propiedade da familia Fernández fixo pública unha iniciativa para ampliar a súa fábrica de produción de medicinas no Porriño, onde está prevista a fabricación da vacina contra o coronavirus de Novavax. Ao carón destas propostas coñécense proxectos do sector privado no ámbito forestal e particularmente na esfera enerxética, unha das máis favorecidas nas liñas de axuda do Next Generation. O groso das iniciativas presentadas polas grandes corporacións do IBEX para desenvolver na Galiza asócianse ás enerxías renovábeis. A isto contribúe as importantes achegas económicas para iniciativas deste tipo recollidas no programa Next Generation, destinando o Estado español o 37% do total dos fondos ao sector enerxético. Deste modo, explícase o novo empuxe á xeración eólica no país, até o punto de se atopar actualmente en tramitación a instalación de 10.000 novos megawatts, nun proceso liderado por compañías foráneas. As propostas do IBEX As iniciativas para a produción de hidróxeno verde explícanse na mesma lóxica. Actualmente están proxectadas na Galiza oito plantas para a xeración deste tipo de enerxía, atopándose detrás delas os principais operadores do sector como Enagas, Naturgy, cunha planta en Cerceda e outra no Porriño, e Endesa, a filial española da italiana Enel, cunha factoría para As Pontes con capacidade de xeración de 100 megawatts (MW) e asociado a seis parques eólicos cunha potencia instalada doutros 511 MW. Ence podería ser outra das grandes corporacións do IBEX beneficiada polos fondos Next Generation. A situación xudicial da súa pasteira da ría en Pontevedra e a decisión do Goberno galego de apostar por un modelo forestal centrado na produción de eucaliptos ten levado o vicepresidente segundo e responsábel da área económica do Goberno, Francisco Conde, a manifestar a intención da Xunta da Galiza de financiar con fondos europeos o traslado da fábrica de Ence e de apoiar con diñeiro público a construción dunha segunda factoría de celulosa no país. A iniciativa non sería a única en apoio do complexo do eucalipto na Galiza. A comezos do mes de novembro do pasado ano, o Executivo de Feixoo formulou como unha das ideas tractores do programa Next Generation o impulso á fabricación de viscosa para o sector téxtil a partir desta especie. Malia que nun primeiro momento se deu por feito a participación de Inditex no proxecto, o conselleiro delegado da compañía, Pablo Isla, anunciou na presentación dos resultados do grupo en marzo de 2021 que a multinacional non tiña intención de solicitar axudas do Next Generation. Calviño e Díaz negocian o rescate en Bruxelas As últimas xuntanzas da negociación do programa de axuste social ligado ao Next Generation decorreron esta semana en Bruxelas baixo a dirección das ministras Nadia Calviño e Yolanda Díaz. Unha proposta que recolle un aumento na idade de xubilación e na base de cálculo das pensións, que avanza nunha fiscalidade non progresiva e que blinda unha lexislación laboral lesiva para as e os traballadores. O maior rescate ao capital privado impulsado en Europa desde a II Guerra Mundial virá acompañado de importantes recortes nos dereitos das maiorías sociais e dunha nova vaga de austeridade. A Xunta dubida sobre as posibilidades dos proxectos Os proxectos anunciados na cuarta feira no Parlamento da Galiza polo vicepresidente segundo, Francisco Conde, para desenvolver directamente polo Goberno galego non presentan grandes novidades en relación aos divulgados con anterioridade. Neste sentido, a listaxe presentada por Conde recolle propostas difundidas noutras ocasións polos responsábeis dos diversos departamentos do Executivo e iniciativas nas que traballaba o Goberno galego con carácter previo á aprobación do Next Generation. A Xunta da Galiza recolle dentro destas 247 propostas de actuacións en diversos campos. Así, no ámbito rural destina fondos para o impulso das “Aldeas Modelo”, un dos proxectos estrela do conselleiro do sector, José González, e para o ámbito da atención aos maiores destina máis de 46 millóns de euros a actuacións nas residencias. Neste caso, 36 millóns son dirixidos a obras de mellora e reformas nos xeriátricos actualmente en funcionamento, na súa gran maioría xestionados por operadores privados. Na mesma liña, o Goberno galego deriva a este programa o financiamento de servizos que presta a Administración desde hai décadas, como acontece coa extinción de lumes. O Goberno galego ten dúbidas sobre as posibilidades dos seus proxectos. Así, o presidente galego manifestou a finais de marzo “a súa intranquilidade por como se desenvolven as cousas”, en referencia á xestión dos fondos por parte do Goberno do Estado español. “Pedimos cogobernanza e queremos participar na xestión dos fondos”, afirmou Feixoo, quen exixiu ao Executivo do Estado “transparencia e certezas” e “unha cogobernanza real para que as comunidades poidan ter unha participación máis activa”. Os temores suscitados por Feixoo a semanas para que o Goberno do Estado formalice a súa candidatura perante a Comisión Europea adiantan un novo choque a conta dos fondos do Next Generation entre o Executivo galego e estatal e preocupan en sectores empresariais galegos. Así, algúns deles, consultados por Nós Diario, critican que non exista vontade de negociar sobre a proposta por ningunha das partes e cuestionan a táctica negociadora de Feixoo.