A Xunta da Galiza deixa a produción de ecolóxico fóra das axudas por ataques da fauna

Representantes da Plataforma de Produtoras e Produtores de Ecolóxico da Galiza (Proecogal) interpuxeron unha demanda na Sala do Contencioso do Tribunal Superior de Xustiza da Galiza (TSXG) contra a Orde de axudas publicada pola Consellaría de Medio Rural o 20 de marzo do 2023, que regula o Plan estratéxico da PAC do Estado español 2023-2027 (Pepac) por considerala “discriminatoria” co sector da produción ecolóxica. Produtores en ecolóxico piden que se cubran 100% das solicitudes de axuda O voceiro desta entidade, Manuel López Louxedo, sinalou esta segunda feira a Nós Diario que tomaron esta decisión pola “falta de fondos e tamén de implicación da Consellaría, no reparto das axudas europeas e propias”. Este gandeiro sinala que, con anterioridade á publicación no Diario Oficial da Galiza (DOG), tiveron lugar varias reunións entre organizacións agrarias e Medio Rural, incluído o Consello Agrario Galego, nas que Proecogal non estivo presente. “Non nos convidaron, polo que xa sospeitabamos o que pasaría, mesmo a partir de informacións das organizacións que si participaban”. López Louxedo afirma que reclamaron a creación “dunha liña independente de axudas na que puidesen participar todas as explotacións e o que fixeron foi unha submedida vinculada a unha liña de axudas agroambientais en convencional”. Cónstalle que nunha das xuntanzas coa Xunta da Galiza, “o director xeral de Gandaría, Agricultura e Industrias Agroalimentarias da Consellería do Medio Rural, José Balseiros, aceptou, mais logo o resultado final do DOG volveu á idea da submedida". Decepción entre os produtores en ecolóxico: "Boas palabras, pero as subvencións seguen perdidas" Confirman esta situación o Sindicato Labrego Galego (SLG) e Unións Agrarias (UUAA). A responsábel de Política Agraria Común do SLG, Ana Rodríguez, sinala a Nós Diario que demandaron a posibilidade "de acceder ás axudas para pastos e, a maiores, ás axudas que teñen un importe de 75 euros/hectárea, cun máximo de 50 hectáreas, se están en zonas de presenza de grandes carnívoros". Esta organización "tampouco entende" o cambio de postura de último momento e sen dar explicacións. Coincide nesta valoración o responsábel de gandaría de UUAA, Javier Iglesias, que explica a Nós Diario que a mudanza da Administración galega “sorprendeunos por contar co visto bo da Consellaría e non entendemos que non entrara a gandaría ecolóxica”. Tal e como está publicada a orde agora si poderán acceder ás axudas as explotacións convencionais. “Quen cumpra cun mínimo de pastoreo tería acceso á axuda, mentres os produtores ecolóxicos quedamos excluídos”, lembra López Louxedo. "Entendemos que é inadmisíbel que as axudas para paliar os danos causados pola fauna salvaxe sexan incompatíbeis coa produción ecolóxica" cando lembra que "polas obrigas deste tipo de produción, que supón ter acceso permanente ao exterior, os nosos animais están máis expostos a sufrir este tipo de ataques". Desde a Consellaría do Medio Rural responderon esta segunda feira á plataforma asegurando que nas directrices comunitarias, a normativa estabelece que as axudas de ecolóxico "son incompatíbeis desde sempre coas agroambientais, neste caso coas axudas complementarias por zonas con presenza de grandes carnívoros". Así mesmo, apuntan sobre os recursos presentados que, "como non pode ser doutra maneira, todos tramítanse coa correspondente resolución". A produción ecolóxica galega comeza 2023 loitando pola súa supervivencia Menos axudas á prevención Na plataforma tamén denuncian que nos últimos anos a Xunta da Galiza tomou outras decisións que os prexudicaron. Poñen como exemplo “a redución das axudas en prevención para reducir os ataques por fauna salvaxe en zonas de presenza de grandes carnívoros”. Alén do sector ecolóxico, as cifras dos danos causados por este motivo en xeral apuntan a un aumento considerábel en 2017 que se mantivo alto cos anos. Desde UUAA falan dun certo “escurantismo” da Xunta da Galiza que dificulta saber os datos concretos actualizados neste apartado. "Hai unhas comisións de danos do lobo nas que participamos as organizacións agrarias", relata Iglesias, "mais só cando nos convocan", engade. Porén, esta organización recompilou, por exemplo, os avisos e os ataques do lobo no período que vai de 2010 até 2020. Neses dez anos rexistráronse un total de 9.839 avisos e resultaron afectadas 19.319 reses. Delas, a maior parte eran ovellas (10.380), seguidas das vacas (4.893), os cabalos (2.252) e as cabras (1.794). Por zonas, as máis prexudicadas son as da Mariña e A Terra Chá. Pola contra, os datos achegados por esta organización agraria indican que as axudas da Consellaría de Medio Rural destinadas á prevención por danos da fauna salvaxe diminuíron en 2022 con respecto ao ano 2021. Distribuídos por animais, indican que no caso do lobo pasaron de 907.010,92 euros a 600.000 euros (-33,8%); no que ten que ver co xabaril eran de 320.594 euros e quedaron en 286.438 euros (-10,7%); e as do oso tiñan un orzamento de 1.257.605,07 euros e pasaron a ser de 906.438 euros (-33,3%). Que condicións deberán cumprir os produtores ecolóxicos para non ter que solicitar certificación? Proecogal prevé presentar máis demandas Proecogal non esqueceu o que lle aconteceu coas axudas o ano pasado. O propio colectivo naceu como consecuencia da denegación por parte da Xunta da Galiza das axudas ao sector da anualidade do exercicio pasado. “A Consellaría de Medio Rural non tivo nin o decoro de contestar os recursos de alzada ás explotacións prexudicadas polas axudas do 2022”, explica o voceiro desta entidade, Manuel López Louxedo. “Pasados os tres meses que estabelece a lei para considerar silencio administrativo, estamos estudando as accións legais oportunas ao respecto”, engade este gandeiro de Proecogal. Fruga oponse a “entregar” a comercialización da produción ecolóxica ás grandes distribuidoras As explotacións ecolóxicas veñen expresando estes meses o seu “malestar” diante das decisións da Consellaría do Medio Rural en relación ás axudas do novo período da Política Agrícola Común (PAC) 2023-2027. O colectivo reclamou incrementar como mínimo en 25% os orzamentos destas axudas para poder facer fronte a todas as solicitudes, algo que lembran "o compromiso da Consellaría e do seu titular para 2023". Desde este colectivo temen que as explotacións sexan "vítimas da perda dos fondos europeos para a conversión e incorporación á produción ecolóxica".