O paro rexistado en Galiza incrementou en febreiro nun 0,70 por cento, por debaixo da media estatal (1,19 por cento). O segundo mes do ano fecha con 292.823 persoas no desemprego en Galiza, récord absoluto rexistado no noso País e unha suba de algo máis de 2.000 persoas respecto do mes de xaneiro.
Segundo os datos publicados polo ministerio de Emprego, Galiza ten hoxe un 6,61% máis de traballador@s desempregad@s do que hai un ano. Por sectores de actividade, 171.758 das persoas que engordaron as listas do paro proveñen do sector servizos, que dá traballo a unha elevada porcentaxe de mulleres, namentres que outras 23.011 persoas non tiñan emprego xa con anterioridade. Unicamente o sector agrogandeiro reduciu o número de desempregad@s, ao rexistrar 165 menos.
Datos a ter en conta á hora de analizar o desemprego na Galiza
Con todo, a estatística que mellor reflicte o comportamento do mercado laboral en Galiza non é a do paro rexistado, mais si a da EPA. Cumpre termos en conta dúas circunstancias que distorcen calquer comparación entre as estatísticas galegas e as españolas no que di respeito ao paro.
En primeiro termo, que a populación activa galega (as persoas que están disponíbeis para seren empregadas) é menor que a española (se tivésemos a mesma taxa de actividade que España teríamos de ter moit@s máis activ@s empregad@s). En segundo lugar, a alta taxa da emigración (isto é, a forza laboral que expulsamos do noso país non computa loxicamente como paro interno).
