O tipo de xuro medio ao que as entidades bancarias concederon créditos para hipotecas na Galiza en marzo foi de 3,664%, o que supón o maior nivel rexistrado desde febreiro de 2012, segundo os datos do Banco de España publicados esta cuarta feira.
Así, os préstamos hipotecarios a máis de tres anos para a adquisición de vivenda libre concedidos polas entidades experimentaron unha suba do tipo de xuro medio por décimo cuarto mes consecutivo, até 3,664%, fronte á taxa de 3,585% rexistrada en febreiro, mentres que un ano antes o tipo de xuro medio ficaba en 1,513%.
A suba prodúcese nun contexto no que o Euribor, o índice ao que se atopan referidas a maioría das hipotecas na Galiza, fechou o mes de marzo en 3,647%, por encima da taxa de 3,534% rexistrada en febreiro. No que vai de abril, este índice a 12 meses rexistra unha taxa mensual media de 3,68%.
Pola súa parte, o tipo de xuro medio dos préstamos hipotecarios entre un e cinco anos para a adquisición de vivenda libre concedidos polas entidades na zona do euro subiu a 3,165% (referido ao mes anterior), fronte á taxa de 3,061% previa.
O BCE aposta polas subas
O economista xefe do Banco Central Europeo (BCE), o irlandés Philip Lane, mostrouse partidario de seguir elevando os tipos de xuro se persiste o escenario de referencia manexado pola institución, aínda que subliñou a importancia da próxima enquisa sobre préstamos bancarios e condicións de financiamento empresarial para avaliar o impacto das turbulencias financeiras na economía.
"Se persiste o escenario de referencia subxacente ás proxeccións macroeconómicas elaboradas polos expertos do BCE de marzo, será apropiado elevar aínda máis as taxas", indicou.
Neste contexto, prevese que o investimento en inmobles comerciais se vexa especialmente afectado polas condicións crediticias máis estritas, mentres que a forte desaceleración proxectada nos prezos da vivenda reducirá o investimento residencial.
