O lixo volverá a quedar sen recoller na Coruña en medio dunha longa loita no sector do lixo xa vai para quince días de folga, razón pola que os sindicatos e os Comités de empresa veñen de anunciar a convocatoria dunha xornada de folga de 24 horas no sector de limpeza viaria, recollida de lixo e tratamento de residuos da comarca que se desenvolverá dende as 23:00 horas do luns 26 de agosto até as 23:00 horas do martes 27. O paro, enmarcado nunha loita conxunta cos traballadores e traballadoras de Albada en Nostián (que piden a readmisión de compañeir@s e opóñense ao recorte en soldos) afectará aos centros de traballo de Cespa-A Coruña, Cespa-As Mariñas e o Complexo Medioambiental de Sogama en Cerceda (incluído o vertedoiro da Areosa). Con esta acción conxunta de solidariedade a empresa aceptou volver a negociar co persoal mentres saen á superficie a posibilidade novos conflitos nun sector que pasa por varios problemas, “especialmente graves tras a reforma laboral do PP”, segundo a CIG.
Neste contexto, o persoal de Albada está realizando un reparto de follas informativas nos mercados de abastos, nas principais rúas da zona centro e nas áreas comerciais, explicando á cidadanía os motivos da folga. Así mesmo, dende o Comité reiterouse a chamada á veciñanza para que se mobilice e proteste contra a “estafa social e a fraude” que están padecendo, tendo en conta que se lles está a cobrar unha taxa por unha reciclaxe e un tratamento dos residuos que na realidade non existe. Como aseguran nas notas que son visíbeis por toda a cidade, e que tamén fan referencia ao capital madrileño de Albada, “o lixo queda aquí, os cartos para Madrid”.
