O sector da imaxe persoal pensa mobilizarse en demanda de que se aprobe no Senado a redución do IVE a 10%. Os centros de estética e barbarías reclaman esta medida pola "crítica" situación económica que pasan, segundo afirman nun comunicado desde a Plataforma de imaxe persoal Crer en nós Compostela.
Este colectivo lembra que en 2012 se lles subiu o IVE de 8% a 21%. Un aumento de 13 puntos que argumentaron desde a Administración española “que sería temporal e que a maioría decidimos asumir e non repercutir á clientela” porque, de o ter feito, moitas das persoas non poderían permitirse acudir aos salóns e porque agardaban regresar ao IVE anterior unha vez superada esa crise.
Promesas incumpridas
Desde esta Plataforma apuntan que en 2017,o PSOE presentou unha Proposición non de lei (PNL) para devolver o IVE reducido, que foi apoiada por Unidas Podemos, PNV e ERC, e aprobada en 2018.
Subliñan que daquela "eran partidos da oposición e curiosamente, eses partidos son os que agora gobernan e non aplican o que daquela aprobaron".
Tamén lembran que o BNG presentou unha emenda demandando que se lles devolvera o IVE reducido, mais denuncian que "volveron votar non", malia a crítica situación que atravesan, xa que, no mellor dos casos, están ao 50% de facturación.
O sector da imaxe persoal salienta algúns dos datos máis destacados dos estudos realizados, segundo os que máis do 20% dos salóns de peiteado, barbarías e estéticas non teñen capacidade de chegar ao Nadal e outro 58% non poderá sobrevivir máis de 6 meses.
Ademais, aseguran que se está a promover a economía somerxida, "porque o persoal que quede sen emprego continuarán peiteando e tinguindo a súa clientela de sempre nas a domicilio".
