O Grupo Sargadelos fichou como asesora externa a que foi directora da tenda de artigos de deseño, fogar e decoración de Inditex, Zara Home, Eva Cárdenas.
Aínda que fontes de Sargadelos non confirman a noticia, outras fontes próximas á empresa si detallan que Eva Cárdenas xa visitou as instalacións da fábrica en Cervo para achegarse á realidade do grupo. Estas fontes enmarcan a fichaxe na intención do grupo de saír a novos mercados.
Eva Cárdenas, parella do presidente da Xunta, Alberto Núñez Feixoo, dirixiu Zara Home desde a súa creación en 2003 até o 2018, tempo no que a marca logrou estar presente en 75 mercados.
Nada en 1965 e graduada en Económicas e Deseño Industrial pola Universidade de Santiago, cun mestrado de Administración e Dirección de Empresas.
A Xunta anunciaba a finais do pasado mes de outubro a súa entrada no Padroado da Fundación Sargadelos.
